19. Zam Yasht
Based on edition of Karl F. Geldner, Avesta, the Sacred
Books of the Parsis, Stuttgart, 1896.
- 0.
- (pa nãm i ýazdã, hôrmezd i hvadâe
i awazûnî gurz hvarahe awazâyât,
zamyât ýazat bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe
mainyêush, haithyâvarshtãm hyat vasnâ
ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô
ahura-tkaêshô,
(Here recite the appropriate Gah dedication.)
garôish ushi-darenahe mazdadhâtahe ash-hvâthrahe
kâvayeheca hvarenanghô mazdadhâtahe ahvaretaheca
hvarenanghô mazdadhâtahe
xshnaothra ýasnâica vahmâica xshnaothrâica
frasastayaêca,
ýathâ ahû vairyô zaotâ frâ-mê
mrûtê,
athâ ratush ashâtcît haca frâ ashava vîdhvå
mraotû!
- 1.
- paoiryô gairish hãm-hishtat spitama zarathushtra
paiti âya zemâ haraiti barsh hâ hama pâirisâite
frâpayå danghush â upaoshanghvåsca, bityô
zeredhazô gairish pâreñtarem aredhô manushahe
hâmô hascit pâirisâite frâpayå
danghush â upaoshanghvåsca.
- 2.
- ahmat haca garayô fraoxshyãn ushidhå ushidarenô
erezifyasca fraorepô xshtvô erezurô haptathô
bûmyô ashtemô raodhitô naomô mazishvå
dasemô añtare-danghush aêvañdasô
erezishô dvadasô vâiti-gaêsô,
- 3.
- âdaranasca bayanasca ishatâca upâiri-saêna
kãsô-tafedhra varafa dva hamañkuna paurvata
ashta vashanô paurvata ashta aurvañtô fåñkavô
cathwârô vidhwana kaofô,
- 4.
- aêzaxasca maênaxasca vâxedhrikaêca
asayaêca tudhaskaêca vishavaêca draoshishvåsca
sâirivåsca nanghushmåsca kakahyushca añtare-kanghaca,
- 5.
- sicidavasca ahuranasca raêmanasca asha-stembanasca urunyô-vâidhimidhkaêca
asnvåsca ushaomasca ushta- hvarenåsca syâmakasca
vafrayåsca vourushasca,
- 6.
- ýahmya-jatarasca adhutavåsca spitavarenåsca
speñtô-dâtasca kadrva-aspasca kaoirisasca taêrasca
barô-srayanô baranasca frâpayåsca gairish
udryasca raêvåsca gairish, ýaêshãmca
parô mashyâka aiwitaêdhaca spashitaêdhaca
gairinãm nâmãm dâdhare,
- 7.
- cathwarasca atha garayô spitama zarathushtra cathwaresatemca
dvaêca saite dvaêca hazangre.
- 8.
- ýavat anu aipi âite garayô vishastare vîspem
avat aipi draonô bazhat athaurunaêca rathaêshtâica
vâstryâica fshuyeñte!
[1]
- 9.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 10.
- ýat asti ahurahe mazdå ýatha dâmãn
dathat ahurô mazdå pouruca vohuca pouruca srîraca
pouruca abdaca pouruca frashaca pouruca bâmyâca
- 11.
- ýat kerenavãn frashem ahûm
azaresheñtem amaresheñtem
afrithyañtem apuyañtem
ýavaêjim ýavaêsum vasô-xshathrem
ýat irista paiti usehishtãn
jasât jvayô amerextish
dathaite frashem vasna anghush,
- 12.
- bun gaêthå amarshañtîsh
ýå ashahe sanguhaitîsh,
nishtat paiti druxsh nâshâite
ýadhât aiwicit jakhmat ashavanem mahrkathâi
aom cithremca stîmca âthatca mare nâshâtaêca
mairyô atha ratush.
- 13.
- ahe raya hvarenanghaca
tem ýazâi surunvata ýasna ukhrem kavaêm
hvarenô mazdadhâtem zaothrâbyô, ukhrem
kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[2]
- 14.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 15.
- ýat asti ameshanãm speñtanãm
xshaêtanãm verezidôithranãm
berezañtãm aiwyâmanãm
taxmanãm âhûiryanãm
ýôi aithyejanghô ashavanô,
- 16.
- ýôi hapta hamô-mananghô
ýôi hapta hamô-vacanghô
ýôi hapta hamô-shyaothnånghô
ýaêshãm asti hamem manô
hamem vacô hamem shyaothnem
hamô pataca frasâstaca
ýô dadhvå ahurô mazdå,
- 17.
- ýaêshãm anyô anyehe
urvânem aiwi-vaênaiti
merethweñtem humataêshu
merethweñtem hûxtaêshu
merethweñtem hvarshtaêshu
merethweñtem garô-nmânem
ýaêshãm raoxshnånghô pañtânô
âvayatãm avi zaothrå,
- 18.
- ýôi heñti ånghãm dâmanãm
ýat ahurahe mazdå
dâtarasca marexshtarasca thwarexshtarasca aiwyâxshtarasca
nipâtarasca nishharetarasca.
- 19.
- taêcit ýôi frashem vasna ahûm dathen
azaresheñtem amaresheñtem afrithyañtem apuyañtem
ýavaêjim ýavaêsum vasô-xshathrem
ýat irista paiti usehishtãn
jasât jvayô amerextish
dathaite frashem vasna anghush,
- 20.
- bun gaêthå amarshañtîsh
ýå ashahe sanguhaitîsh,
nishtat paiti druxsh nâshâite
ýadhât aiwicit jakhmat ashavanem mahrkathâi
aom cithremca stîmca âthatca mare nâshâtaêca
mairyô atha ratush.
ahe raya hvarenanghaca
tem ýazâi surunvata ýasna ukhrem kavaêm
hvarenô mazdadhâtem zaothrâbyô, ukhrem
kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[3]
- 21.
- ukhrem kavaêm
ýavaêjim ýavaêsum vasô-xshathrem
ýat irista paiti usehishtãn
jasât jvayô amerextish
dathaite frashem vasna anghush,
-
- bun gaêthå amarshañtîsh
ýå ashahe sanguhaitîsh,
nishtat paiti druxsh nâshâite
ýadhât aiwicit jakhmat ashavanem mahrkathâi
aom cithremca stîmca âthatca mare nâshâtaêca
mairyô atha ratush.
-
- ahe raya hvarenanghaca
tem ýazâi surunvata ýasna ukhrem kavaêm
hvarenô mazdadhâtem zaothrâbyô, ukhrem
kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
anyâish dâmãn,
- 22.
- ýat asti mainyavanãm ýazatanãm
gaêithyanãmca zâtanãmca azâtanãmca
frashô-carethrãm saoshyañtãmca.
- 23.
- taêcit ýôi frashem vasna ahûm dathen
azaresheñtem amaresheñtem afrithyañtem apuyañtem
ýavaêjim ýavaêsum vasô-xshathrem
ýat irista paiti usehishtãn
jasât jvayô amerextish
dathaite frashem vasna anghush,
- 24.
- bun gaêthå amarshañtîsh
ýå ashahe sanguhaitîsh,
nishtat paiti druxsh nâshâite
ýadhât aiwicit jakhmat ashavanem mahrkathâi
aom cithremca stîmca âthatca mare nâshâtaêca
mairyô atha ratush.
ahe raya hvarenanghaca
tem ýazâi surunvata ýasna ukhrem kavaêm
hvarenô mazdadhâtem zaothrâbyô, ukhrem
kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[4]
- 25.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 26.
- ýat upanghacat haoshyanghem paradhâtem
darekhemcit aipi zrvânem
ýat xshayata paiti bûmîm haptaithyãm
daêvanãm mashyânãmca
ýâthwãm pairikanãmca
sâthrãm kaoyãm karafnãmca
ýô janat dva thrishva
mâzainyanãm daêvanãm
varenyanãmca drvatãm.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[5]
- 27.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 28.
- ýat upanghacat taxmem urupi azinavañtem
ýat xshayata paiti bûmîm haptaithyãm
daêvanãm mashyânãmca
ýâthwãm pairikanãmca
sâthrãm kaoyãm karafnãmca
- 29.
- ýat bavat aiwi-vanyå
vîspe daêva mashyâca
vîspe ýâtavô pairikåsca
ýat barata angrem mainyûm
framitem aspahe kehrpa
thrisatem aiwi-gâmanãm
va pairi zemô karana.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[6]
- 30.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 31.
- ýat upanghacat
ýim ýimem xshaêtem hvãthwem
darekhemcit aipi zrvânem
ýat xshayata paiti bûmîm haptaithyãm
daêvanãm mashyânãmca ýâthwãm
pairikanãmca sâthrãm kaoyãm karafnãmca.
- 32.
- ýô uzbarat haca daêvaêibyô
uye ishtishca saokâca
uye fshaonishca vãthwâca
uye thrãfsca frasastishca,
ýenghe xshathrâdha hvairyañtu
astu uye hvarethe ajyamne
amareshañta pasu vîra
anghaoshemne âpa urvaire.
- 33.
- ýenghe xshathrâdha nôit aotem ångha
nôit garemem
nôit zaurva ångha nôit mereithyush
nôit araskô daêvô-dâtô para
anâdruxtôit,
para ahmât ýat hîm aêm
draokhem vâcim anghaithîm
cinmâne paiti barata.
- 34.
- âat ýat hîm aêm draokhem vâcim
anghaithîm
cinmâne paiti barata
vaênemnem ahmat haca hvarenô
merekhahe kehrpa frashusat,
avaênô hvarenô fraêshtô
ýô ýimô xshaêtô hvãthwô
brâsat ýimô ashâtô
dêush-manahyâica hô steretô
nidârat upairi zãm.
- 35.
- paoirîm hvarenô apanemata
hvarenô ýimat haca xshaêtât
shusat hvarenô ýimat haca vîvanghushât
merekhahe kehrpa vârekhnahe, aom hvarenô hañgêurvayata
mithrô ýô vouru-gaoyaoitish ýô
srut-gaoshô hazangrâ-ýaoxshtish, mithrem vîspanãm
dah'yunãm danghupaitîm ýazamaide ýim
fradathat ahurô mazdå hvarenanguhastemem mainyavanãm
ýazatanãm.
- 36.
- ýat bitîm hvarenô apanemata hvarenô
ýimat haca xshaêtât shusat hvarenô ýimat
haca vîvanghushât merekhahe kehrpa vârekhnahe,
aom hvarenô hañgêurvayata
vîsô puthrô âthwyânôish
vîsô sûrayå thraêtaonô ýat
âs mashyânãm verethravanãm verethravastemô
ainyô zarathushtrât.
- 37.
- ýô janat azhîm dahâkem thrizafanem
thrikameredhem xshvash-ashîm hazangrâ-ýaoxshtîm
ashaojanghem daêvîm drujem akhem gaêthâvyô
drvañtem ýãm ashaojastemãm drujem
fraca kereñtat angrô mainyush aoi ýãm
astvaitîm gaêthãm mahrkâi ashahe gaêthanãm.
- 38.
- ýat thritîm hvarenô apanemata hvarenô
ýimat haca xshaêtât shusat hvarenô ýimat
haca vîvanghushât merekhahe kehrpa vârekhnahe,
aom hvarenô hañgêurvayata naire-manå
keresâspô ýat âs mashyânãm
ukhranãm aojishtô ainyô zarathushtrât
nairyayât parô hãm-veretôit.
- 39.
- ýat dim upanghacat ýâ ukhra naire hãm-
vareitish, nairyãm hãm-vareitîm ýazamaide
eredhwô-zeñgãm ahvafnyãm
âsitô-gâtûm jakhâurum
ýâ upanghacat keresâspem.
- 40.
- ýô janat azhîm srvarem
ýim aspô-garem nere-garem
ýim vîshavañtem zairitem
ýim upairi vish raodhat
xshvaêpaya vaênaya bareshna,
ýim upairi vish raodhat
ârshtyô-bareza zairitem
ýim upairi keresâspô
ayangha pitûm pacata
â rapithwinem zrvânem tafsatca hô mairyô
hvîsatca, frãsh ayanghô frasparat ýaeshyañtîm
âpem parånghât, parãsh tarshtô
apatacat naire-manå keresâspô.
- 41.
- ýô janat gañdarewem ýim zairi-
pâshnem
ýô apatat vîzafârô
merexshânô gaêthå astvaitîsh ashahe,
ýô janat hunavô ýat pathanaya nava
hunavasca nivikahe
hunavasca dâshtayânôish,
ýô janat zaranyô-pusem hitâspem
vareshaomca dânayanem
pitaonemca ash-pairikem.
- 42.
- ýô janat arezô-shamanem
nairyãm-hãm-vâretivañtem
taxmem frâzushtem ...ushtem
jirem zbaremnem jikhâurum
afrakatacim barôzushem
apa-disem nyâidâuru
apastananghô gatô arezahe.
- 43.
- ýô janat snâvidhkem ýim srvô-zanem
aseñgô-gâum, hô avatha vyâxmanyata,
aperenâyu ahmi nôit perenâyu
ýezi bavâni perenâyu
zãm caxrem kerenavâne
asmanem rathem kerenavâne,
- 44.
- avanayeni speñtem mainyûm
haca raoxshna garô-nmâna
uspatayeni angrem mainyûm
erekhata haca duzhangha,
tê mê vâshem thañjayåñte
speñtasca mainyush angrasca ýezi mãm nôit
janât naire-manå keresâspô, tem janât
naire-manå keresâspô
avi apanem gayehe
sânem ushtânahe.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[7]
- 45.
- ukhrem ahvaretem hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 46.
- ýahmi paiti parehvâithe
speñtasca mainyush angrasca aêtahmi paiti at ahvarete,
adhât ashte frangharecayat âsishte katarascit, speñtô
mainyush ashtem frangharecayat vohuca manô ashemca vahishtem
âtremca ahurahe mazdå puthrem, angrô mainyush
ashtem frangharecayat akemca manô aêshememca xrvî-drûm
azhîmca dahâkem spityuremca ýimô-kereñtem.
- 47.
- adhât frasha hãm-râzayata
âtarsh mazdå ahurahe
uiti avatha manghânô,
aêtat hvarenô hañgerefshâne ýat
ahvaretem,
âat hê paskât fradvarat
azhish thrizafå duzhdaênô
uta zaxshathrem daomnô,
- 48.
- inja avat hañdaêsayanguha
âtarsh mazdå ahurahe,
ýezi aêtat nyâsånghe ýat ahvaretem
frâ thwãm paiti apâtha
nôit apaya uzraocayâi
zãm paiti ahuradhâtãm
thrâthrâi ashahe gaêthanãm, adha âtarsh
zasta paiti apa-geurvayat fraxshni ushtânô- cinahya
ýatha azhish bizhivångha.
- 49.
- adhât frasha hãm-dvarat
azhish thrizafå duzhdaênô
uiti avatha manghânô,
aêtat hvarenô hañgrefshâne ýat
ahvaretem,
âat hê paskât hãm-râzayata
âtarsh mazdå ahurahe
uiti vacêbish aojanô,
- 50.
- tinja avat hañdaêsayanguha
azhe thrizafem dahâka
ýezi aêtat nyâsånghe ýat ahvaretem
frâ thwãm zadangha paiti uzuxshâne zafare paiti
uzraocayeni
nôit apaya afrapatâi
zãm paiti ahuradhâtãm
mahrkâi ashahe gaêthanãm,
adha azhish gava paiti apa-geurvayat
fraxshni ushtânô-cinahya
ýatha âtarsh biwivångha.
- 51.
- aêtat hvarenô frapinvata
avi zrayô vouru-kashem,
â-dim hathra hañgeurvayat
apãm napå aurvat-aspô, tatca izyeiti apãm
napå aurvat-aspô,
aêtat hvarenô hañgrefshâne ýat
ahvaretem
bunem zrayanghô gufrahe
bune jafranãm vairyanãm.
- 52.
- berezañtem ahurem xshathrîm xshaêtem apãm
napâtem aurvat-aspem ýazamaide
arshânem zavanô-sum
ýô nerêush dadha ýô nerêush
tatasha
ýô upâpô ýazatô
srut-gaoshôtemô asti ýezimnô.
- 53.
- âat vô kascit mashyânãm
uiti mraot ahurô mazdå
âi ashâum zarathushtra
hvarenô ahvaretem isaêta,
athaurunô hô râtanãm
raoxshni-xshnûtem ishånghaêta
athaurunô hô râtanãm
pouru-xshnûtem ishånghaêta
athaurunô hô râtanãm.
- 54.
- tem hacât ashish
pourush-hvâthra spâra-dâshta
sûra gêushca vâstraheca tem hacât verethrem
vîspô-ayârem
amaênikhnem tarô-ýârem,
âat ana verethra hacimnô
vanât haênayå xrvishyeitish
âat ana verethra hacimnô
vanât vîspe tbishyañtô.
ahe raya hvarenanghaca tem ýazâi surunvata ýasna
ukhrem ahvaretem hvarenô mazdadhâtem zaothrâbyô,
ukhrem ahvaretem hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[8]
- 55.
- ukhrem ahvaretem hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 56.
- ýat isat mairyô tûiryô frangrase
zrayanghô vouru-kashahe,
makhnô apa-spayat vastrå
tat hvarenô isô ýat asti
airyanãm dah'yunãm
zâtanãm azâtanãmca
ýatca ashaonô zarathushtrahe,
â-tat hvarenô frazgadhata
tat hvarenô apatacat
tat hvarenô apa-hidhat,
adha hâu apakhzhârô bvat
zrayanghô vouru-kashahe
vairish ýô haosravå nãma.
- 57.
- âat us-patat frangrase
tûrô ash-varecå spitama zarathushtra
zrayanghat haca vourukashât
akhãm daoithrîm daomnô, ithe itha ýathna
ahmâi nôit tat hvarenô pairi-abaom ýat
asti airyanãm dah'yunãm zâtanãm azâtanãmca
ýatca ashaonô zarathushtrahe.
- 58.
- vaêm hãm-raêthwayeni
vîspa tarshuca xshudhraca
masanaca vanghanaca srayanaca,
thwãm zjaiti ahurô mazdå
paitishå dâmãn dathânô,
âat ava-patat frangrase
tûrô ash-varecå spitama zarathushtra
avi zrayô vourukashem.
- 59.
- âtbitîm makhnô apa-spayat vastrå
tat hvarenô isô ýat asti
airyanãm dah'yunãm zâtanãm azâtanãmca
ýatca ashaonô zarathushtrahe,
â-tat hvarenô frazgadhata
tat hvarenô apatacat
tat hvarenô apa-hidhat,
adha hâu apakhzhârô bvat
zrayanghô vouru-kashahe
vairish ýô vanghazdå nãma.
- 60.
- âat us-patat frangrase
tûrô ash-varecå spitama zarathushtra
zrayanghat haca vourukashât
akhãm daoithrîm daomnô, ithe itha ýathna
ahmâi avaetha itha ýathna kahmâi, nôit
tat hvarenô pairi-abaom ýat asti airyanãm
dah'yunãm zâtanãm azâtanãmca
ýatca ashaonô zarathushtrahe.
- 61.
- vaêm hãm-raêthwayeni
vîspa tarshuca xshudhraca
masanaca vanghanaca srayanaca,
thwãm zjaiti ahurô mazdå
paitishå dâmãn dathânô,
âat ava-patat frangrase
tûrô ash-varecå spitama zarathushtra avi zrayô
vourukashem.
- 62.
- âthritîm apa-spayat vastrå tat hvarenô
isô ýat asti airyanãm dah'yunãm zâtanãm
azâtanãmca
ýatca ashaonô zarathushtrahe,
â-tat hvarenô frazgadhata
tat hvarenô apatacat
tat hvarenô apa-hidhat,
adha hâu apakhzhârô bvat zrayanghô vouru-kashahe
âfsh ýâ awzhdânva nãma.
- 63.
- âat us-patat frangrase
tûrô ash-varecå spitama zarathushtra
zrayanghat haca vourukashât
akhãm daoithrîm daomnô, ithe itha ýathna
ahmâi avathe itha ýathna ahmâi âvôya
itha ýathna ahmâi, nôit tat hvarenô pairi-abaom
ýat asti airyanãm dah'yunãm
zâtanãm azâtanãmca
ýatca ashaonô zarathushtrahe.
- 64.
- nôit tat hvarenô pairi-abavat ýat asti
airyanãm dah'yunãm zâtanãm azâtanãmca
ýatca ashaonô zarathushtrahe.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[9]
- 65.
- ukhrem ahvaretem hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 66.
- ýat upanghacaiti
ýô avadhât fraxshayeite
ýatha zrayô ýat kãsaêm haêtumatem
ýatha gairish ýô ushidhå
ýim aiwitô paoirish âpô
hãm gairishâcô jaseñtô.
- 67.
- avi tem avi-hañtacaiti avi tem avi hãm-vazaite
hvâstraca hvaspaca
fradatha hvarenanguhaitica
ýâ srîra ushtavaitica
ýâ sûra urvadhca pouru-vâstra
erezica zarenumatica,
avi tem avi hañtacaiti avi tem avi hãm-vazaite
haê... raêvå hvarenanguhå
spaêtinish varemish sispimnô ......emnô paoirish
vôikhnå.
- 68.
- hacaiti dim aspahe aojô
hacaiti ushtrahe aojô
hacaiti vîrahe aojô
hacaiti kavaêm hvarenô astica ahmi ashâum zarathushtra
avavat kavaêm hvarenô
ýatha ýat idha anairyå danghush
hakat usca us-frâvayôit.
- 69.
- athra pascaêta vaozirem
baodheñtô shudhem tarshnemca
baodheñtô aotem urvâxremca,
tat asti kavaêm hvarenô
thrâthrem airyanãm dah'yunãm
gêushca pañcô-hyayâi
avanghe narãm ashaonãm
daênayåsca mâzdayasnôish.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[10]
- 70.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 71.
- ýat upanghacat kavaêm kavâtem ýimca
kavaêm aipi-vohum ýimca kavaêm usadhanem ýimca
kavaêm arshnem ýimca kavaêm pisinem ýimca
kavaêm byarshânem ýimca kavaêm syâvarshânem
- 72.
- ýat bâun vîspe aurva vîspe taxma
vîspe thamnanghuñta vîspe varecanghuñta
vîspe ýaoxshtivañta vîspe darshi-kairi
kave.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[11]
- 73.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 74.
- ýat upanghacat kavaêm haosravanghem
amaheca paiti hutâshtahe verethrakhnaheca paiti ahuradhâtahe
vanaiñtyåsca paiti uparatâtô sanguhasca
paiti husastayå sanguhasca paiti amuyamnayå sanguhasca
paiti avanemnayå hathravataheca paiti hamerethanãm
- 75.
- drvaheca paiti aojanghô hvarenanghasca paiti mazdadhâtahe
tanuyåsca paiti drvatâtô âsnayåsca
paiti vanghuyå frazañtôish dangrayå vyâxanayå
xshôithnyô spitidôithrayå ãzô-bûjô
hvîrayå huzañtêush paiti aparayå
vyarethyayå vahishtahe anghêush
- 76.
- xshathraheca paiti bânumatô darekhayåsca
paiti darekhô-jîtôish vîspanãmca
paiti ayaptanãm vîspanãmca paiti baêshazanãm.
- 77.
- ýat
kava haosrava tãm keresem upa tãm caretãm
ýãm darekhãm nava-frâthweresãm
razurem ýat dim mairyô nurem aspaêshu paiti
paretata,
vîspe bavat aiwi-vanyå
ahurô kava haosrava
mairîm tûirîm frangrasyânem
bañdayat keresavazdem
puthrô kaêna syâvarshânâi
zurô-jatahe narahe
akhraêrathaheca naravahe.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[12]
- 78.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 79.
- ýat upanghacat
ashavanem zarathushtrem
anumatêe daênayâi
anuxtêe daênayâi
anvarshtêe daênayâi ýat as vîspahe
anghêush astvatô ashem ashavastemô xshathrem
huxshathrôtemô raêm raêvastemô hvarenô
hvarenanguhastemô verethra verethravastemô.
- 80.
- vaênemnem ahmat para daêva patayen vaênemnem
mayå frâvôit
vaênemnem apara karshayen
jainish haca mashyâkaêibyô,
âat tå snaodheñtish gerezânå
hazô nivarezayen daêva.
- 81.
- âat tê aêvô ahunô vairyô
ýim ashavanem zarathushtrem frasrâvayat vî-berethweñtem
âxtûirîm aparem xraozhdyehya frasrûiti
zemaregûza avazat vîspe daêva ayesnya avahmya.
- 82.
- ýenghe tat hvarenô isat mairyô tûiryô
frangrase vîspâish avi karshvãn ýâish
hapta,
pairi ýâish hapta karshvãn
mairyô apatat frangrase
isô hvarenô zarathushtrâi,
â-tat hvarenô frazgadhata
avi vayãn vîtâpem, inja mê urvisyatem
aêzô jasatem aêzahe ýatha kathaca tê
âs zaoshô mana ýat ahurahe mazdå daênayåsca
mâzdayasnôish.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[13]
- 83.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 84.
- ýat upanghacat kavaêm vîshtâspem
anumatêe daênayâi
anuxtêe daênayâi
anvarshtêe daênayâi
ýat imãm daênãm âstaota dushmainyûm
sizhdyô daêvãn apa ashavãn.
- 85.
- ýô druca paurvãnca ashâi ravô
ýaêsha ýô druca paurvãnca ashâi
ravô vîvaêdha ýô bâzushca
upastaca vîsata ainghå daênayå ýat
ahurôish zarathushtrôish,
- 86.
- ýô hîm stâtãm hitãm
haitîm uzvazhat haca hinûiwyô nî-hîm
dasta maidhyôishâdhem berezi-râzem afrakadhavaitîm
ashaonîm thrãfdhãm gêushca vâstraheca
frithãm gêushca vâstraheca.
- 87.
- bavat aiwi-vanyå
ýase taxmô kava vîshtâspô
tãthryâvañtem duzhdaênem
peshanemca daêvayasnem
drvañtemca arejat-aspem
uta anyåscit akha
duzhvañdravô h'yaonånghô.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[14]
- 88.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 89.
- ýat upanghacat
saoshyañtãm verethrâjanem
uta anyåscit haxayô,
ýat kerenavât frashem ahûm
azarsheñtem amaresheñtem
afrithyañtem apuyañtem
ýavaêjim ýavaêsum vasô-xshathrem
ýat irista paiti usehishtât
jasât jvayô amerextish
dathaite frashem vasna anghush,
- 90.
- bun gaêthå amarshañtîsh ýå
ashahe sanguhaitîsh, nishtat paiti druxsh nâshâite
ýadhât aiwicit jakhmat ashavanem mahrkathâi
aom cithremca stîmca âthatca mare nâshâtaêca
mairyô atha ratush.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
[15]
- 91.
- ukhrem kavaêm hvarenô mazdadhâtem ýazamaide
ash-vañdrem uparô-kairîm thamnanguhañtem
varecanguhañtem ýaoxshtivañtem taradhâtem
anyâish dâmãn,
- 92.
- ýat astvat-eretô fraxshtâite
haca apat kãsaoyât
ashtô mazdå ahurahe
vîspa-taurvayå puthrô
vaêdhem vaêjô ýim vârethrakhnem
ýim barat taxmô thraêtaonô
ýat azhish dahâkô jaini,
- 93.
- ýim barat frangrase tûrô
ýat drvå zainigâush jaini
ýim barat kava haosrava
ýat tûrô jaini frangrase
ýim barat kava vîshtâspô
ashahe haênayå caêshemnô,
tå avadha drujem nizhbarât
ashahe haca gaêthâbyô.
- 94.
- hô didhât xratêush dôithrâbyô
vîspa dâmãn paiti vaênât
shô dushcithrayayå
hô vîspem ahûm astvañtem
izhayå vaênât dôithrâbya
daresca dathat amerexshyañtîm
vîspãm ýãm astvaitîm gaêthãm.
- 95.
- anghe haxayô frâyeñte
astvat-eretahe verethrakhnô
humananghô hvacanghô
hushyaothnånghô hudhaêna
naêdha-cit mithô-aojånghô
aêshãm hvaêpaithya hizvô,
aêshu parô frânâmâite
aêshmô xrvidruxsh dushhvarenå,
vanât asha akãm drujim
ýãm dushcithrãm temanghaênîm.
- 96.
- vanaiti akemcit manô
vohu manô tat vanaiti,
vanaiti mithaoxtô
------
erezhuxdhô vâxsh tem vanaiti,
vanât haurvåsca ameretåsca
va shudhemca tarshnemca
vanât haurvåsca ameretåsca
akhem shudhemca tarshnemca,
frânâmâiti duzhvarshtâvarsh
angrô mainyush axshyamanô.
ahe raya hvarenanghaca tem ýazâi surunvata ýasna
ukhrem kavaêm hvarenô mazdadhâtem zaothrâbyô,
ukhrem kavaêm hvarenô mazdadhâtem ýazamaide
haomayô gava baresmana hizvô danghangha mãthraca
vacaca shyaothnaca zaothrâbyasca arshuxdhaêibyasca
vâkhzhibyô.
ýenghê hâtãm âat ýesnê
paitî vanghô mazdå ahurô vaêthâ
ashât hacâ ýånghãmcâ tãscâ
tåscâ ýazamaide!
- (Recite silently:)
-
- 97.
- (hôrmezd i hvadâe i awazûnî mardum
mardum sardagã hamâ sardagã ham bâ ýasht
i vahã vaem vahe dîn i mâzdayasnã âgâhî
âstvãnî nêkî rasãnât
êduñ bât,)
- (Recite aloud:)
- ýathâ ahû vairyô...(2).
ýasnemca vahmemca aojasca zavareca âfrînâmi
garôish ushi-darenahe mazdadhâtahe ash-hvâthrahe
kâvayeheca hvarenanghô mazdadhâtahe ahvaretaheca
hvarenanghô mazdadhâtahe.
ashem vohû....
-
- ahmâi raêshca ... hazangrem ... jasa-mê ... (kerba mazhd) ... ashem vohû...!!
Go to [Avesta -- Zoroastrian Archives
| Khorda Avesta: Contents
| Zam Yasht
| English]