AVESTA: Vendidad
Fargard 1.
- 1
- mraot ahurô mazdå spitamâi zarathushtrâi,
azem dadhãm spitama zarathushtra asô râmô-
dâitîm nôit kudat shâitîm, ýeidhi-zî
azem nôit daidhyãm spitama zarathushtra asô
râmô-dâitîm nôit kudat shâitîm
vîspô anghush astvå airyanem vaêjô
frâshnvât.
- 2
- paoirîm asanghãmca shôithranãmca
vahishtem frâthweresem azem ýô ahurô
mazdå airyanem vaêjô vanghuyå dâityayå.
âat ahe paityârem frâkereñtat angrô
mainyush pouru-mahrkô azhimca ýim raoidhitem zyãmca
daêvô-dâtem,
- 3
- dasa avathra månghô zayana dva hãmina taêca
heñti sareta âpô sareta zemô sareta urvarayå
adha zimahe maidhim adha zimahe zaredhaêm adha zyåscit
pairi-pataiti adha fraêshtem vôikhnanãm.
- 4
- bitîm asanghãmca shôithranãmca vahishtem
frâthweresem azem ýô ahurô mazdå
gâum ýim sukhdhô-shayanem, âat ahe paityârem
frâkereñtat angrô mainyush pouru-mahrkô
skaitîm ýãm gavaca dayaca pouru-mahrkem.
- 5
- thritîm asanghãmca shôithranãmca
vahishtem frâthweresem azem ýô ahurô
mazdå
môurum sûrem ashavanem, âat ahe paityârem
frâkereñtat angrô mainyush pouru-mahrkô
maredhãmca vîthushãmca.
- 6
- tûirîm asanghãmca shôithranãmca
vahishtem frâthweresem azem ýô ahurô
mazdå
bâxdhîm srîrãm eredhwô-drafshãm,
âat ahe paityârem frâkereñtat angrô
mainyush pouru-mahrkô bravaremca usadhasca.
- 7
- puxdhem asanghãmca shôithranãmca vahishtem
frâthweresem azem ýô ahurô mazdå
nisâim ýim añtare môurumca bâxdhîmca,
âat ahe paityârem frâkereñtat angrô
mainyush pouru-mahrkô akhemca vîmanô-hîm.
- 8
- xshtûm asanghãmca shôithranãmca
vahishtem frâthweresem azem ýô ahurô
mazdå
harôyûm ýim vish-harezanem, âat ahe paityârem
frâkereñtat angrô mainyush pouru-mahrkô
saraskemca driwikâca.
- 9
- haptathem asanghãmca shôithranãmca vahishtem
frâthweresem azem ýô ahurô mazdå
vaêkeretem ýim dûzhakô- sayanem, âat
ahe paityârem frâkereñtat angrô mainyush
pouru-mahrkô pairikãm ýãm xnãthaite
ýâ upanghacat keresâspem.
- 10
- ashtemem asanghãmca shôithranãmca vahishtem
frâthweresem azem ýô ahurô mazdå
urvãm pouru-vâstrãm, âat ahe paityârem
frâkereñtat angrô mainyush pouru-mahrkô
akha aiwishtâra.
- 11
- nâumem asanghãmca shôithranãmca
vahishtem frâthweresem azem ýô ahurô
mazdå xneñtem ýim vehrkânô- shayanem,
âat ahe paityârem frâkereñtat angrô
mainyush pouru-mahrkô akha anâperetha shyaothna ýâ
narô-vaêpaya.
- 12
- dasemem asanghãmca shôithranãmca vahishtem
frâthweresem azem ýô ahurô mazdå
harahvaitîm srîrãm, âat ahe paityârem
frâkereñtat angrô mainyush pouru-mahrkô
akha anâperetha shyaothna ýâ nasuspaya.
- 13
- aêvañdasem asanghãmca shôithranãmca
vahishtem frâthweresem azem ýô ahurô
mazdå haêtumañtem raêvañtem hvarenanguhañtem,
âat ahe paityârem frâkereñtat angrô
mainyush pouru-mahrkô akha ýâtava,
- 14
- aêmca ahe cithrô daxshtô anghat aêm
cithrô-paiti-dayô ýatha kavacit jasen zaoyehe
ýâtumeñtem adha heñti ýâtumastema
adha taêcit uzjaseñti ýâ mereñcyâica
zaradhakhnyâica xshtãmicatca madhaxaheca.
- 15
- dvadasem asanghãmca shôithranãmca vahishtem
frâthweresem azem ýô ahurô mazdå
rakhãm thrizañtûm, âat ahe paityârem
frâkereñtat angrô mainyush pouru-mahrkô
akhemca uparô-vîmanô-hîm.
- 16
- thridasem asanghãmca shôithranãmca vahishtem
frâthweresem azem ýô ahurô mazdå
caxrem sûrem ashavanem, âat ahe paityârem frâkereñtat
angrô mainyush pouru-mahrkô akha anâperetha
shyaothna ýâ nasuspacya.
- 17
- cathrudasem asanghãmca shôithranãmca vahishtem
frâthweresem azem ýô ahurô mazdå
varenem ýim cathru-gaoshem ýahmâi zayata thraêtaonô
jañta azhôish dahâkâi, âat ahe
paityârem frâkereñtat angrô mainyush
pouru-mahrkô arathwyâca daxshta anairyâca dainghush-aiwishtâra.
- 18
- pañcadasem asanghãmca shôithranãmca
vahishtem frâthweresem azem ýô ahurô
mazdå ýô hapta heñdu, âat ahe
paityârem frâkereñtat angrô mainyush
pouru-mahrkô arathwyâca daxshta arathwîmca garemâum.
- 19
- xshvash-dasem asanghãmca shôithranãmca
vahishtem frâthweresem azem ýô ahurô
mazdå upa aodhaêshu ranghayå ýô
asârô aiwyâxshayeiñti, âat ahe
paityârem frâkereñtat angrô mainyush
pouru-mahrkô zyãmca daêvô-dâtem
taozhyâca dainghush-aiwishtâra.
- 20
- heñti anyåscit asåsca shôithråsca
srîråsca gufråsca berexdhåsca frashåsca
bâmyåsca!
ashem vohû...!!
Fargard 2.
- 1
- peresat zarathushtrô ahurem mazdãm,
ahura mazda mainyô
spênishta dâtare gaêthanãm
astvaitinãm ashâum kahmâi paoiryô mashyânãm
aperese-tûm ýô ahurô mazdå anyô
mana ýat zarathushtrâi,
kahmâi fradaêsayô daênãm
ýãm âhûirîm zarathushtrîm.
- 2
- âat mraot ahurô mazdå, ýimâi
srîrâi hvãthwâi ashâum zarathushtra
ahmâi paoiryô mashyânãm
aperese azem ýô ahurô mazdå
anyô thwat ýat zarathushtrât,
ahmâi fradaêsaêm daênãm
ýãm âhûirîm zarathushtrîm.
- 3
- âat hê mraot zarathushtra
azem ýô ahurô mazdå,
vîsangha mê ýima srîra vîvanghana
meretô beretaca daênayâi,
âat mê aêm paityaoxta
ýimô srîrô zarathushtra,
nôit dâtô ahmi nôit cistô
meretô beretaca daênayâi.
- 4
- âat hê mraom zarathushtra
azem ýô ahurô mazdå,
ýezi mê ýima nôit vîvîse
meretô beretaca daênayâi âat mê
gaêthå frâdhaya âat mê gaêthå
varedhaya âat mê vîsâi gaêthanãm
thrâtâca haretâca aiwyâxshtaca.
- 5
- âat mê aêm paityaoxta
ýimô srîrô zarathushtra, azem tê
gaêthå frâdhayeni azem tê gaêthå
varedhayeni azem tê vîsâne gaêthanãm
thrâtâca haretâca aiwyâxshtaca, nôit
mana xshathre bvat aotô vâtô nôit garemô
nôit axtish nôit mahrkô.
- 6
- âat hê zaya frabarem
azem ýô ahurô mazdå suwrãm zaranaênîm
ashtrãmca zaranyô- paêsîm.
- 7
- ýimô asti berethe xshathrayå.
- 8
- âat ýimâi xshathrâi thrisatô-zima
hañjaseñti,
âat hê îm zå bvat perene
pasvãmca staoranãmca
mashyânãmca sûnãmca vayãmca
âthrãmca suxrãm saociñtãm
nôit hîm gâtvô viñden
pasvasca staorâca mashyâca.
- 9
- âat ýimâi paiti-vaêdhaêm,
ýima srîra vîvanghana
perene îm zå hañgata
pasvãmca staoranãmca
mashyânãmca sûnãmca vayãmca
âthrãmca suxrãm saociñtãm
nôit hîm gâtvô viñdeñti
pasvasca staorâca mashyâca.
- 10
- âat ýimô frashûsat raocå â
upa rapithwãm hû paiti adhwanem,
hô imãm zãm aiwishvat
suwrya zaranaênya
avi dim sifat ashtraya uityaojanô,
fritha speñta ârmaite
fraca shva vîca nemangha barethre pasvãmca staoranãmca
mashyânãmca.
- 11
- âat ýimô imãm zãm vîshâvayat
aêva thrishva ahmât masyehîm ýatha para
ahmât as, tem ithra fracareñta pasvasca staorâca
mashyâca
hvãm anu ushtîm zaoshemca
ýatha kathaca hê zaoshô.
- 12-14
- âat ýimâi xshathrâi xshvash-satô-zima
hañjaseñti, âat hê îm zå
bvat perene ... mashyânãmca.
- 15
- âat ýimô imãm zãm vîshâvayat
dva thrishva ahmât masyehîm ýatha para ahmât
as, tem ithra fracareñta pasvasca staorâca mashyâca
hvãm anu ushtîm zaoshemca ýatha kathaca hê
zaoshô.
- 16
- âat ýimâi xshathrâi nava-satô-zima
hañjaseñti, âat hê îm zå
bvat perene pasvãmca staoranãmca mashyânãmca
sûnãmca vayãmca âthrãmca suxrãm
saociñtãm, nôit hîm gâtvô
viñden pasvasca staorâca mashyâca.
- 17
- âat ýimâi paiti-vaêdhaêm, ýima
srîra vîvanghana perene îm zå hañgata
pasvãmca staoranãmca mashyânãmca sûnãmca
vayãmca âthrãmca suxrãm saociñtãm,
nôit hîm gâtvô viñdeñti
pasvasca staorâca mashyâca.
- 18
- âat ýimô frashûsat raocå â
upa rapithwãm hû paiti adhwanem, hô imãm
zãm aiwishvat suwrya zaranaênya avi dim sifat ashtraya
uityaojanô, fritha speñta ârmaite fraca shva
vîca nemangha barethre pasvãmca staoranãmca
mashyânãmca.
- 19
- âat ýimô imãm zãm vîshâvayat
thribyô thrishvaêibyô ahmât masyehîm
ýatha para ahmât as, tem ithra fracareñta
pasvasca staorâca mashyâca hvãm anu ushtîm
zaoshemca ýatha kathaca hê zaoshô!
- 20
- hañjamanem frabarata ýô dadhvå ahurô
mazdå hathra mainyaoibyô ýazataêibyô
srûtô airyene vaêjahi vanghuyå dâityayå,
hañjamanem frabarata ýô ýimô
xshaêtô hvãthwô hathra vahishtaêibyô
mashyâkaêibyô srûtô airyene vaêjahi
vanghuyå dâityayå.
- 21
- â-tat hañjamanem paiti-jasat ýô
dadhvå ahurô mazdå hathra mainyaoibyô
ýazataêibyô srûtô airyene vaêjahi
vanghuyå dâityayå, â-tat hañjamanem
paiti-jasât ýô ýimô xshaêtô
hvãthwô hathra vahishtaêibyô mashyâkaêibyô
srûtô airyene vaêjahi vanghuyå dâityayå.
- 22
- âat aoxta ahurô mazdå ýimâi,
ýima srîra vîvanghana avi ahûm astvañtem
akhem zimô jangheñtu ýahmat haca staxrô
mrûrô zyå, avi ahûm astvañtem akhem
zimô jangheñtu ýahmat haca paurvô snaodhô
vafra snaêzhât barezishtaêibyô gairibyô
bãshnubyô areduyå.
- 23
- thrizhatca idha ýima gêush apa-jasat ýatca
anghat thwyãstemaêshu asanghãm ýatca
anghat bareshnush paiti gairinãm ýatca jãfnushva
raonãm paxrumaêshu nmânaêshu.
- 24
- parô zimô aêtanghå
danghush anghat beretô vâstrem
tem âfsh paurva vazaidhyâi
pasca vîtaxti vafrahe abdaca idha ýima anguhe astvaite
sadayât ýat idha pasêush anumayehe padhem vaênâite.
- 25
- âat tem varem kerenava caretu-drâjô kemcit
paiti cathrushanãm hathra taoxma upa-bara pasvãmca
staoranãmca mashyânãmca sûnãmca
vayãmca âthrãmca suxrãm saociñtãm,
âat tem varem kerenava caretu-drâjô kemcit paiti
cathrushanãm narãm aiwi-xshôithne caretu-drâjô
kemcit paiti cathrushanãm gavãm gâvayanem.
- 26
- hathra âpem frâtat-caya
hâthrô-masanghem adhwanem
hathra marekhå avastaya, avi mat zairi-gaonem mat hvairyeite
ajyamnem,
hathra nmânå avastaya katemca fraskembemca fravâremca
pairi-vâremca.
- 27
- hathra vîspanãm narãm nâirinãmca
taoxma upa-bara ýôi heñti ainghå zemô
mazishtaca vahishtaca sraêshtaca, hathra vîspanãm
gêush saredhanãm taoxma upa-bara ýôi
heñti ainghå zemô mazishtaca vahishtaca sraêshtaca.
- 28
- hathra vîspanãm urvaranãm taoxma upa-bara
ýôi heñti ainghå zemô barezishtaca
hubaoidhitemaca, hathra vîspanãm hvarethanãm
taoxma upa-bara ýôi heñti ainghå zemô
hvarezishtaca hubaoidhitemaca, tê kerenava mithwaire ajyamnem
vîspem â ahmât ýat aête narô
varefshva anghen.
- 29
- mâ athra frakavô mâ apakavô mâ
apâvayô mâ haredhish mâ driwish mâ
daiwish mâ kasvîsh mâ vîzbârish
mâ vîmîtô-dañtânô mâ
paêsô ýô vîteretô-tanush
mâdha-cim anyãm daxshtanãm ýôi
heñti angrahe mainyêush daxshtem mashyâishca
paiti nidhâtem.
- 30
- fratemem dainghêush nava perethwô kerenava madhemô
xshvash nitemô tishrô, fratemem perethwô hazangrem
narãm nâirinãmca taoxma upa-bara madhemô
xshvash sata nitemô tishrô sata, aiwica tê varefshva
suwrya zaranaênya
apica tem varem mareza dvarem raocanem hvâraoxshnem añtare-naêmât.
- 31
- âat mãsta ýimô, kutha tê
azem varem kerenavâne ýâ mê aoxta ahurô
mazdå, âat aoxta ahurô mazdå ýimâi,
ýima srîra vîvanghana ainghå zemô
pâshnâbya vîspara zastaêibya vîxadha
mãnayen ahe ýatha nû mashyâka xshivisti
zemê vîshâvayeiñte.
- 32
- âat ýimô avatha kerenaot ýatha dim
ishat ahurô mazdå ainghå zemô pâshnâbya
vîsparat zastaêibya vîxadhat mãnayen
ahe ýatha nû mashyâka xshivisti zemê
vîshâvayeiñte.
- 33
- âat ýimô varem kerenaot caretu-drâjô
kemcit paiti cathrushanãm, hathra taoxma upa-barat pasvãmca
staoranãmca mashyânãmca sûnãmca
vayãmca âthrãmca suxrãm saociñtãm,
âat ýimô varem kerenaot caretu-drâjô
kemcit paiti cathrushanãm narãm aiwi-xshôithne
caretu-drâjô kemcit paiti cathrushanãm gavãm
gâvayanem.
- 34
- hathra âpem frâtat-cayat
hâthrô-masanghem adhwanem
hathra marekhå avastayat avi mat zairi-gaonem mat hvairyeite
ajyamnem,
hathra nmânå avastayat katemca fraskembemca fravâremca
pairi-vâremca.
- 35
- hathra vîspanãm narãm nâirinãmca
taoxma upa-barat ýôi heñti ainghå zemô
mazishtaca vahishtaca sraêshtaca, hathra vîspanãm
gêush saredhanãm taoxma upa-barat ýôi
heñti ainghå zemô mazishtaca vahishtaca sraêshtaca.
- 36
- hathra vîspanãm urvaranãm taoxma upa-barat
ýôi heñti ainghå zemô barezishtaca
hubaoidhitemaca, hathra vîspanãm hvarethanãm
taoxma upa-barat ýôi heñti ainghå zemô
hvarezishtaca hubaoidhitemaca, tê kerenaot mithwaire ajyamnem
vîspem â ahmât ýat aête narô
varefshva anghen.
- 37
- nôit athra frakavô nôit apakavô nôit
apâvayô nôit haredhish nôit driwish nôit
daiwish nôit kasvîsh nôit vîzbârish
nôit vîmîtô-dañtânô
nôit paêsô ýô vîteretô-tanush
naêdha-cim anyãm daxshtanãm ýôi
heñti angrahe mainyêush daxshtem mashyâishca
paiti nidhâtem.
- 38
- fratemem dainghêush nava perethwô kerenaot madhemô
xshvash nitemô tishrô fratemem perethwô hazangrem
narãm nâirinãmca taoxma upa-barat madhemô
xshvash sata nitemô tishrô sata, aiwica hô varefshva
suwrya zaranaênya
apica hô varem marezat dvarem raocanem hvâraoxshnem
añtare-naêmât.
- 39
- dâtare gaêthanãm astvaitinãm ashâum
cayô âat aête raocå anghen ashâum
ahura mazda ýô avatha â-raocayeite aêtaêshva
varefshva ýô ýimô kerenaot.
- 40
- âat aoxta ahurô mazdå, hvadhâtaca
raocå stidhâtaca, hakeret zî irixtahe sadhayaca
vaênaite starasca måsca hvareca.
- 41
- taêca ayare mainyeñte ýat ýâre,
cathwaresatem aiwi-gâmanãm dvaêibya haca nerebya
dva nara us-zayeiñte mithwana strica nairyasca atha aêtaêshãm
ýôi gêush saredhanãm, taêca narô
sraêshta gaya jvaiñti aêtaêshva varefshva
ýô ýimô kerenaot.
- 42
- dâtare gaêthanãm astvaitinãm ashâum,
kô avatha daênãm mâzdayasnîm vî-barat
aêtaêshva varefshva ýô ýimô
kerenaot, âat aoxta ahurô mazdå, vîsh
karshipta spitama zarathushtra.
- 43
- dâtare ... ashâum, kô aêshãm
asti anghuca ratushca, âat mraot ahurô mazdå,
urvatat-narô zarathushtra tûmca ýô zarathushtrô!
ashem vohû...!!
Fargard 3.
- 1
- dâtare gaêthanãm astvaitinãm ashâum,
kva paoirîm ainghå zemô shâishtem, âat
mraot ahurô mazdå, ýat bâ paiti nâ
ashava frayat spitama zarathushtra aêsmô-zastô
baresmô-zastô gao-zastô hâvanô-zastô
âxshtaêdha daênaya vaca framrû mithremca
vouru-gaoyaoitîm jaidhyã râmaca hvâstrem.
- 2
- dâtare ... ashâum, kva bitîm ainghå
zemô shâishtem, âat mraot ahurô mazdå,
ýat bâ paiti nâ ashava nmânem uzdasta
âthravat gaomavat nâirivat puthravat hvãthwavat.
- 3
- âat pascaêta ahe nmânahe frapithwô
gâush frapithwô ashem frapithwô vastrem frapithwô
spâ frapithwô nâirika frapithwô aperenâyûkô
frapithwô âtarsh frapithwô vîspãm
hujyâitish.
- 4
- dâtare ... ashâum, kva thritîm ainghå
zemô shâishtem, âat mraot ahurô mazdå,
ýat bâ paiti fraêshtem kârayeiti spitama
zarathushtra ýavanãmca vâstranãmca
urvaranãmca hvarethô-bairyanãm ýat
vâ anâpem âi âpem kerenaoiti ýat
vâ âpem âi anâpem kerenaoiti.
- 5
- dâtare ... ashâum, kva tûirîm ainghå
zemô shâishtem, âat mraot ahurô mazdå,
ýat bâ paiti fraêshtem us-zîzeñti
pasvasca staorâca.
- 6
- dâtare ... ashâum, kva puxdhem ainghå zemô
shâishtem, âat mraot ahurô mazdå, ýat
bâ paiti fraêshtem maêzeñti pasvasca
staorâca.
- 7
- dâtare ... ashâum, kva paoirîm ainghå
zemô ashâishtem, âat mraot ahurô mazdå,
ýat arezûrahe grîvaya spitama zarathushtra
ýat ahmya daêva hañdvareñti drujô
haca geredhâdha.
- 8
- dâtare ... ashâum, kva bitîm ainghå
zemô ashâishtem, âat mraot ahurô mazdå,
ýat bâ paiti fraêshtem sairi nikañte
spânasca irista naraêca irista.
- 9
- dâtare ... ashâum, kva thritîm ainghå
zemô ashâishtem, âat mraot ahurô mazdå,
ýat bâ paiti fraêshtem daxma uzdaêza
kiryeiñte ýahmya narô irista nidhayeiñte.
- 10
- dâtare ... ashâum, kva tûirîm ainghå
zemô ashâishtem, âat mraot ahurô mazdå,
ýat bâ paiti fraêshtem bavaiñti angrô-
mainyavanãm geredhãm.
- 11
- dâtare ... ashâum, kva puxdhem ainghå zemô
ashâishtem, âat mraot ahurô mazdå, ýat
bâ paiti narsh ashaonô spitama zarathushtra nâirikaca
aperenâyûkasca varaithîm pañtãm
azôit pãsnvånghem hikvånghem jarezîm
baraiti vâcim.
- 12
- dâtare ... ashâum, kô paoirîm imãm
zãm mazishta xshnaoma xshnâvayeiti, âat mraot
ahurô mazdå, ýat bâ paiti fraêshtem
uskeñti ýahmya sairi nikañte spânasca
irista naraêca irista.
- 13
- dâtare ... ashâum kô bitîm imãm
zãm mazishta xshnaoma xshnâvayeiti, âat mraot
ahurô mazdå, ýat bâ paiti fraêshtem
daxma uzdaêza vîkañti ýahmya narô
irista nidhayeiñte!
- 14
- mâ-cish barô aêvô ýat iristem,
âat ýezi-shê barât aêvô ýat
iristem upa vâ nasush raêthwât nånghanat
haca cashmanat haca hizumat haca paitish-hvarenâdha fravâxshat
haca frashumakat haca tê, aêshãm paiti sruye
aêsha druxsh ýâ nasush upa-dvãsaiti,
ayaozhdya pascaêta bavaiñti ýavaêca
ýavaêtâtaêca.
- 15
- dâtare ... ashâum kva aêtahe narsh gâtush
anghat ýat iristô-kashahe, âat mraot ahurô
mazdå, ýat anghat ainghå zemô vî-âpô-tememca
vî-urvarô-tememca ýaozhdâtô-zemôtememca
hushô-zemôtememca kambishtemca aête pathå
frayãn pasvasca staorâca âtremca ahurahe mazdå
baresmaca ashaya frastaretem naremca ýim ashavanem.
- 16
- dâtare ... ashâum cvat drâjô haca
âthrat cvat drâjô haca apat cvat drâjô
haca baresmen frastairyât cvat drâjô haca nerebyô
ashavabyô.
- 17
- âat mraot ahurô mazdå, thrisata-gâim
haca âthrat thrisata-gâim haca apat thrisata- gâim
haca baresmen frastairyât thrigâim haca nerebyô
ashavabyô.
- 18
- aêtadha hê aête mazdayasna ainghå
zemô pairi-daêzãn pairi-daêzayãn,
hvarethaêibyô pascaêta âstayañta
aête ýôi mazdayasna vastraêibyô
pascaêta âstayañta aête ýôi
mazdayasna.
- 19
- draêjishtôtemaêshvaca niuruzdôtemaêshvaca
aêtå hvarethå hvaratu aêtå vastrå
vanghatu vîspem â ahmât ýat hanô
vâ zaururô vâ pairishtâ-xshudrô
vâ bavât.
- 20
- âat ýat hanô vâ zaururô vâ
pairishtâ-xshudrô vâ bavât aojishtemca
dim pascaêta mazdayasna tañcishtemca vaêdhyôtememca
upa-maitîm barezanghãm pãstô-frathanghem
hê kameredhem vînâthayen ash-hvaretemaêibyô
speñtô-mainyavanãm dâmanãm kerefsh-hvârãm
kerefsh paiti nisrinuyât vayãm kahrkâsãm
uityaojanô, avå hîm paiti mithnâiti vîspem
dushmatemca duzhûxtemca duzhvarshtemca
- 21
- ýezica hê anya akha shyaothna fravarshta paitita
hê citha âat ýezi-shê anya akha shyaothna
nôit fravarshta paititem ahe narsh ýavaêca
ýavaêtâtaêca!
- 22
- dâtare ... ashâum kô thritîm imãm
zãm mazishta xshnaoma xshnâvayeiti, âat mraot
ahurô mazdå, ýat bâ paiti fraêshtem
vîkeñte angrô- mainyavanãm geredhãm.
- 23
- dâtare ... ashâum kô tûirîm
imãm zãm mazishta xshnaoma xshnâvayeiti, âat
mraot ahurô mazdå, ýat bâ paiti fraêshtem
kârayeiti spitama zarathushtra ýavanãmca vâstranãmca
urvaranãmca hvarethôbairyanãm ýat vâ
anâpem âi âpem kerenaoiti ýat vâ
âpem âi anâpem kerenaoiti.
- 24
- nôit zî îm zå shå ýâ
darekha akarshta saêta ýâ karshya karshivata
aibish tat vanghêush aiwi-shôithna
idha carâiti huraodha
ýâ darekha aputhra aêti
aibish tat vanghêush arshânô.
- 25
- ýô imãm zãm aiwi-verezyeiti spitama
zarathushtra
hâvôya bâzvô dashinaca
dashina bâzvô haoyaca
upa hê gaonem baraiti mãnayen ahe ýatha-nâ
fryô fryâi vañtaoe stareta gâtush sayamanô
puthrem vâ gaonem vâ avi ava-baraiti.
- 26
- ýô imãm zãm aiwi-verezyeiti spitama
zarathushtra hâvôya bâzvô dashinaca dashina
bâzvô haoyaca
âat aoxta îm zå, nara
ýô mãm aiwi-verezyeihi
hâvôya bâzvô dashinaca
dashina bâzvô haoyaca
- 27
- bâdha idha âfrasâne danghubyô
bâdha idha aêni berethi
vîspå hvareñtîsh para-barãn
hãmberethwãm parô ýavahe.
- 28
- ýô imãm zãm nôit aiwi-verezyeiti
spitama zarathushtra hâvôya bâzvô dashinaca
dashina bâzvô haoyaca
âat aoxta îm zå, nara
ýô mãm nôit aiwi-verezyeihi
hâvôya bâzvô dashinaca
dashina bâzvô haoyaca
- 29
- bâdha idha hishtahe anyehe dvare srayanô hvareñtîsh
peresemnaêshuca,
bâdha thwãm tarasca ånghânô
srasciñtîsh hvarethå bairyeiñte tê
âbya bairyeiñte
ýaêshãm dim frâyô vohunãm.
- 30
- dâtare gaêthanãm astvaitinãm ashâum
kat asti daênayå mâzdayasnôish uruthware,
âat mraot ahurô mazdå, ýat ukhrem paiti
ýaokarshti spitama zarathushtra.
- 31
- ýô ýaom kârayeiti hô ashem
kârayeiti, hô daênãm mâzdayasnîm
fravâza vazaite, hô imãm daênãm
mâzdayasnîm frapinaoiti satem paitishtanãm
hazangrem paiti-daranãm baêvare paiti ýasnô-kereitinãm.
- 32
- ýat ýavô dayât âat daêva
hvîsen ýat sudhush dayât âat daêva
tusen ýat pishtrô dayât âat daêva
uruthen ýat guñdô dayât âat daêva
peredhen, idha mithnât daêva aipi-jaiñti nmâne
ainghâi guñdayâi
zafare tafsãn aya masô
hãm-urvîsvånghô sadayeiti
ýat ýavô pourush bavât.
- 33
- adha mãthrem tadha mairyât,
naêcish ahvareñtãm tva nôit ukhrãm
ashayãm nôit ukhrãm vâstryãm
nôit ukhrãm puthrôishtîm, hvâshaya
zî vîspô anghush astvå jvaiñti
ahvâshe framiryeite!
- 34
- dâtare gaêthanãm astvaitinãm ashâum
kô puxdhem imãm zãm mazishta xshnaoma xshnâvayeiti,
âat mraot ahurô mazdå, ýat bâ paiti
spitama zarathushtra ainghå zemô naire ashaone verezyât
ashaya dadhâiti.
- 35
- ýat bâ paiti spitama zarathushtra ainghå
zemô naire ashaone verezyât ashaya vanghuya nôit
dadhâiti avi tem spayât speñtayå ârmatôish
temô âca vaêshô âca acishtem âca
ahûm â vîspaca avi tikhra nimata!
- 36
- dâtare gaêthanãm astvaitinãm ashâum
ýat ainghå zemô nikañte spânasca
irista naraêca irista naêmem ýâre- drâjô
anuskañte kâ-hê asti citha, âat mraot
ahurô mazdå, pañca sata upâzananãm
upâzôit aspahe ashtraya pañca sata sraoshô-caranaya.
- 37
- dâtare ... ashâum ýat ainghå zemô
nikañte spânasca irista naraêca irista ýâre-drâjô
anuskañte kâ hê asti citha, âat mraot
ahurô mazdå, hazangrem upâzananãm upâzôit
aspahe ashtraya hazangrem sraoshô-caranaya.
- 38
- dâtare ... ashâum ýat ainghå zemô
nikañte spânasca irista naraêca irista byâre-drâjô
anuskañte kâ hê asti citha kâ-hê
asti âperetish kat hê asti ýaozhdâthrem.
- 39
- âat mraot ahurô mazdå, nava-hê asti
citha nava-hê asti âperetish nôit hê asti
ýaozhdâthrem anâperetha haca shyaothna ýavaêca
ýavaêtâtaêca.
- 40
- kva aêva, ýezi anghat âstûtô
vâ aiwi-sravanô vâ daênãm mâzdayasnîm
âat ýezi anghat anâstûtô vâ
anaiwi-sravanô vâ daênãm mâzdayasnîm,
aêtâcit aêibyô spånghaite âstavanaêibyô
daênãm mâzdayasnîm everezenbyô
pascaêta arathwya shyaothna.
- 41
- spayeite zî spitama zarathushtra daêna mâzdayasnish
narsh âstavanahe bañdem spayeite draoshem spayeite
ashavakhnîm spayeite nasuspaêm spayeite anâperethem
shyaothnem spayeite derezânô-peretem pârem spayeite
vîspa tâ shyaothna ýâ-cica verezyeiti.
- 42
- mãnayen ahe spitama zarathushtra daêna mâzdayasnish
narsh ashaonô framerezaiti vîspem dushmatemca duzhûxtemca
duzhvarshtemca ýatha vâtô derezi-takathrô
thwâshem dashinât pairi framerezôit, [vohu idha
zarathushtra hvarshtem shyaothnem verezimnem vanguhi daêna
mâzdayasnish perenâyush cithãm thweresaiti]!
ashem vohû...!!
Go to [Avesta -- Zoroastrian Archives
| Vendidad: Contents
| 1-3
| Next
| English]