5. Ardui Sur Bano Yasht

Based on edition of Karl F. Geldner, Avesta, the Sacred Books of the Parsis, Stuttgart, 1896.

0.

(pa nãm i ýazdã, hôrmezd i hvadâe i awazûnî gurz hvarahe awazâyât, arduîsûr bãnô bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe mainyêush, haithyâvarshtãm hyat vasnâ ferashôtemem. staomî ashem, ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

areduyå âpô anâhitayå ashaonyå vîspanãmca urvaranãm mazdadhâtanãm xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

[1]

1.

mraot ahurô mazdå spitamâi zarathushtrâi, ýazaêsha-mê-hîm spitama zarathushtra ýãm aredvîm sûrãm anâhitãm
perethû-frâkãm baêshazyãm
vîdaêvãm ahurô-tkaêshãm
ýesnyãm anguhe astvaite
vahmyãm anguhe astvaite
âdhû-frâdhanãm ashaonîm
vãthwô-frâdhanãm ashaonîm
gaêthô-frâdhanãm ashaonîm
shaêtô-frâdhanãm ashaonîm
dainghu-frâdhanãm ashaonîm.

2.

ýâ vîspanãm arshnãm xshudrå ýaozhdadhâiti
ýâ vîspanãm hâirishinãm
zãthâi garewãn ýaozhdadhâiti ýâ vîspå hâirishîsh huzâmitô dadhâiti
ýâ vîspanãm hâirishinãm
dâitîm rathwîm paêma ava-baraiti.

3.

masitãm dûrât frasrûtãm
ýâ asti avavaiti masô
ýatha vîspå imå âpô
ýå zemâ paiti frataciñti
ýâ amavaiti fratacaiti
hukairyât haca barezanghat
aoi zrayô vouru-kashem.

4.

ýaozeñti vîspe karanô
zrayâi vouru-kashaya
â-vîspô maidhyô ýaozaiti
ýat hîsh aoi fratacaiti
ýat hîsh aoi frazhgaraiti
aredvî sûra anâhita,
ýenghe hazangrem vairyanãm
hazangrem apakhzhâranãm,
kascitca aêshãm vairyanãm
kascitca aêshãm apakhzhâranãm
cathware-satem ayare-baranãm
hvaspâi naire baremnâi.

5.

ainghåsca mê aêvanghå âpô
apakhzhârô vî-jasâiti vîspâish aoi karshvãn ýâish hapta, ainghåsca mê aêvanghå âpô
hamatha ava-baraiti
hãminemca zayanemca,
hâ-mê âpô ýaozhdadhâiti hâ arshnãm xshudrå hâ xshathrinãm garewãn hâ xshathrinãm paêma.

6.

ýãm azem ýô ahurô mazdå hizvârena uzbaire fradathâi nmânaheca vîsaheca zañtêushca dainghêushca pâthrâica harethrâica aiwyâxshtrâica nipâtayaêca nishangharetayaêca.

7.

âat frashûsat zarathushtra
aredvî sûra anâhita
haca dathushat mazdå,
srîra vâ anghen bâzava
aurusha aspô-staoyehîsh,
frâ srîra zusha sispata
aurvaiti bâzu-staoyehi
avat manangha mainimna,

8.

kô mãm stavât kô ýazâite haomavaitibyô gaomavaitibyô zaothrâbyô ýaozhdâtâbyô pairiangharshtâbyô, kahmâi azem upanghacayeni haca-manâica ana-manâica frâranghâi haomananghâica.

9.

ahe raya hvarenanghaca
tãm ýazâi surunvata ýasna
tãm ýazâi huyashta ýasna aredvîm sûrãm anâhitãm ashaonîm zaothrâbyô, ana buyå zavanô-sâsta ana buyå huyashtatara aredvî sûre anâhite
haomayô gava baresmana, hizvô danghangha mãthraca, vacaca shyaothnaca zaothrâbyasca, arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide!

[2]

10.

ýazaêsha-mê-hîm spitama zarathushtra ýãm aredvîm anâhitãm ... dainghu-frâdhanãm ashaonîm, [yt5.1 is repeated here and in the following Kardehs.]

11.

ýô paourva-vâshem vazâite
ãxnå drazhaite vâshahe
ahmya vâshe vazemna
narem paitishmaremna
avat manangha mainimna,
kô mãm stavât ... haomananghâica. [yt5.8]
ahe raya ... tåsca ýazamaide! [yt5.9]

[3]

12.

ýazaêsha-mê ... dainghu-frâdhanãm ashaonîm,

13.

ýenghe cathwârô vashtâra
spaêta vîspa hama-gaonånghô
hama-nâfaêni berezañta
taurvayañta vîspanãm tbishvatãm tbaêshå
daêvanãm mashyânãmca
ýâthwãm pairikanãmca
sâthrãm kaoyãm karafnãmca.
ahe raya ... tåscâ ýazamaide!

[4]

14.

ýazaêsha-mê ... dainghu-frâdhanãm ashaonîm,

15.

amavaitîm xshôithnîm berezaitîm huraodhãm ýenghe avavat asnâatca xshafnâatca
tâtå âpô ava-bareñte
ýatha vîspå imå âpô
ýå zemâ paiti frataciñti
ýâ amavaiti fratacaiti.
ahe raya ... tåsca ýazamaide.

[5]

16.

ýazaêsha-mê ... dainghu-frâdhanãm ashaonîm,

17.

tãm ýazata
ýô dadhvå ahurô mazdå airyene vaêjahi vanghuyå dâityayå
haomayô gava baresmana hizvô danghangha mãthraca vacaca shyaothnaca zaothrâbyasca arshuxdhaêibyasca vâkhzhibyô.

18.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem hâcayene
puthrem ýat pourushaspahe
ashavanem zarathushtrem
anumatêe daênayâi
anuxtêe daênayâi
anu-varshtêe daênayâi.

19.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[6]

20.

ýazaêsha-mê ... dainghu-frâdhanãm ashaonîm,

21.

tãm ýazata
haoshyanghô paradhâtô
upa upa-bdi harayå satem aspanãm arshnãm hazangrem gavãm baêvare anumayanãm.

22.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem upemem xshathrem
bavâni vîspanãm dah'yunãm
daêvanãm mashyânãmca
ýâthwãm pairikanãmca
sâthrãm kaoyãm karafnãmca,
ýatha azem nijanâni
dva thrishva mâzanyanãm daêvanãm
varenyanãmca drvatãm.

23.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåsca ýazamaide!

[7]

24.

ýazaêsha-mê ... dainghu-frâdhanãm ashaonîm,

25.

tãm ýazata
ýô ýimô xshaêtô hvãthwô
hukairyât paiti barezanghat satem aspanãm arshnãm hazangrem gavãm baêvare anumayanãm.

26.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem upemem xshathrem
bavâni vîspanãm dah'yunãm
daêvanãm mashyânãmca
ýâthwãm pairikanãmca
sâthrãm kaoyãm karafnãmca,
ýatha azem uzbarâni haca daêvaêibyô
uyê îshtishca saokâca
uyê fshaonîshca vãthwâca
uyê thrãfsca frasastishca.

27.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[8]

28.

ýazaêsha-mê ... dainghu-frâdhanãm ashaonîm,

29.

tãm ýazata
azhish thrizafå dahâkô
bawrôish paiti dainghaove satem aspanãm arshnãm hazangrem gavãm baêvare anumayanãm.

30.

âat hîm jaidhyat,
avat âyaptem dazdi-mê vanguhi sevishte aredvî sûre anâhite ýatha azem amashyã kerenavâni vîspâish aoi karshvãn ýâish hapta.

31.

nôit ahmâi dathat tat avat âyaptem aredvî sûra anâhita.
ahe raya ... tåscâ ýazamaide!

[9]

32.

ýazaêsha-mê ... dainghu-frâdhanãm ashaonîm,

33.

tãm ýazata
vîsô puthrô âthwyânôish
vîsô sûrayå thraêtaonô
upa varenem cathru-gaoshem satem aspanãm arshnãm hazangrem gavãm baêvare anumayanãm.

34.

âat hîm jaidhyat,
avat âyaptem dazdi-mê vanguhi sevishte aredvî sûre anâhite ýat bavâni aiwi-vanyå azhîm dahâkem thrizafanem thrikameredhem xshvash-ashîm hazangrâ-ýaoxshtîm ashaojanghem daêvîm drujem akhem gaêthâvyô drvañtem ýãm ashaojastemãm drujem fraca kereñtat angrô mainyush aoi ýãm astvaitîm gaêthãm mahrkâi ashahe gaêthanãm, [cf. y9.8; the good Mss. abbreviate.]
uta-hê vañta azâni
sanghavâci arenavâci
ýôi hen kehrpa sraêshta zazâitêe
gaêthyâi-tê ýôi abdôteme.

35.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[10]

36.

ýazaêsha-mê ... dainghu-frâdhanãm ashaonîm,

37.

tãm ýazata
naire-manå keresâspô
pasne varôish pishinanghô satem aspanãm arshnãm hazangrem gavãm baêvare anumayanãm.

38.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýat bavâni aiwi-vanyå
gañdarewem ýim zairi-pâshnem
upa ýaozeñta karana
zraya vouru-kashaya
âtacâni sûrem nmânem
drvatô ýat pathanayå
skarenayå dûraêpârayå.

39.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[11]

40.

ýazaêsha-mê ... dainghu-frâdhanãm ashaonîm,

41.

tãm ýazata
mairyô tûiryô frangrase
hañkaine paiti ainghå zemô satem aspanãm arshnãm hazangrem gavãm baêvare anumayanãm.

42.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem avat hvarenô
apayemi ýim vazaite
maidhim zrayanghô vouru-kashahe
ýat asti airyanãm dah'yunãm
zâtanãm azâtanãmca
ýatca ashaonô zarathushtrahe.

43.

nôit ahmâi dathat tat avat âyaptem aredvî sûra anâhita.
ahe raya ... tåscâ ýazamaide!

[12]

44.

ýazaêsha-mê ... dainghu-frâdhanãm ashaonîm,

45.

tãm ýazata
aurvô ash-varecô kava usa
erezifyât paiti garôit
satem aspanãm arshnãm hazangrem gavãm baêvare anumayanãm.

46.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem upemem xshathrem
bavâni vîspanãm dah'yunãm
daêvanãm mashyânãmca ýâthwãm pairikanãmca
sâthrãm kaoyãm karafnãmca.

47.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[13]

48.

ýazaêsha-mê ... dainghu-frâdhanãm ashaonîm,

49.

tãm ýazata
arsha airyanãm dah'yunãm
xshathrâi haosrava
pasne varôish caêcastahe
jafrahe urvâpahe satem aspanãm arshnãm hazangrem gavãm baêvare anumayanãm.

50.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem upemem xshathrem
bavâni vîspanãm dah'yunãm
daêvanãm mashyânãmca ... karafnãmca,
ýat vîspanãm ýuxtanãm
azem fratemem thañjayeni
ana hvaretãm ýãm darekhãm
nava-frâthweresât razurem
ýô mãm mairyô nurem manô
aspaêshu paiti paretata.

51.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[14]

52.

ýazaêsha-mê ... dainghu-frâdhanãm ashaonîm,

53.

tãm ýazata
taxmô tusô rathaêshtârô
barshaêshu paiti aspanãm
zâvare jaidhyañtô hitaêibyô
drvatâtem tanubyô
pouru-spaxshtîm tbishyañtãm paiti-jaitîm dushmainyunãm
hathrâ-nivâitîm hamerethanãm aurvathanãm tbishyañtãm. [y57.26]

54.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýat bavâni aiwi-vanyå
aurva hunavô vaêsakaya
upa dvarem xshathrô-sukem
apanôtemem kanghaya
berezañtaya ashavanaya,
ýatha azem nijanâni
tûiryanãm dah'yunãm
pañcasakhnâi satakhnâishca
satakhnâi hazangrakhnâishca
hazangrakhnâi baêvarekhnâishca
baêvarekhnâi ahãxshtakhnâishca.

55.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåsca ýazamaide!

[15]

56.

ýazaêsha-mê ... dainghu-frâdhanãm ashaonîm,

57.

tãm ýazeñta
aurva hunavô vaêsakaya
upa dvarem xshathrô-sukem
apanôtemem kanghaya
berezañtaya ashavanaya satem aspanãm arshnãm hazangrem gavãm baêvare anumayanãm.

58.

âat hîm jaidhyen,
avat âyaptem dazdi-nô
vanguhi sevishte aredvî sûre anâhite
ýat bavâma aiwi-vanyå
taxmem tusem rathaêshtârem
ýatha vaêm nijanâma
airyanãm dah'yunãm
pañcasakhnâi satakhnâishca
satakhnâi hazangrakhnâishca
hazangrakhnâi baêvarekhnâishca
baêvarekhnâi ahãxshtakhnâishca.

59.

nôit aêibyascit dathat tat avat âyaptem aredvî sûra anâhita.
ahe raya ... tåscâ ýazamaide!

[16]

60.

ýazaêsha-mê ... dainghu-frâdhanãm ashaonîm,

61.

tãm ýazata
pâurvô ýô vifrô navâzô
ýat dim usca uzdvãnayat
verethrajå taxmô thraêtaonô
merekhahe kehrpa kahrkâsahe.

62.

hô avatha vazata
thri-ayarem thri-xshaparem
paitish nmânem ýim hvâpaithîm
nôit aora avôirisyât,
thraoshta xshafnô thrityayå
frâkhmat ushånghem sûrayå vivaitîm
upa ushånghem upa-zbayat
aredvîm sûrãm anâhitãm,

63.

aredvî sûre anâhite
moshu mê java avanghe
nûrem mê bara upastãm, hazangrem tê azem zaothranãm haomavaitinãm gaomavaitinãm ýaozhdâtanãm pairiangharshtanãm barâni aoi âpem ýãm ranghãm
ýezi jum frapayemi
aoi zãm ahuradhâtãm
aoi nmânem ýim hvaêpaithîm.

64.

upa-tacat aredvî sûra anâhita
kainînô kehrpa srîrayå
ashamayå huraodhayå
uskât ýâstayå erezvaithyô
raêvat cithrem âzâtayå
nizeñga aothra paitishmuxta
zaranyôurvîxshna bâmya,

65.

hâ-hê bâzava geurvayat
moshu tat âs nôit darekhem
ýat frâyatayat thwaxshemnô
aoi zãm ahuradhâtãm
aoi nmânem ýim hvaêpaithîm
drûm avañtem airishtem
hamatha ýatha paracit

66.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[17]

67.

ýazaêsha-mê ... dainghu-frâdhanãm ashaonîm,

68.

tãm ýazata jâmâspô
ýat spâdhem pairi-avaênat
dûrât ayañtem rasmaoyô
drvatãm daêvayasnanãm satem aspanãm arshnãm hazangrem gavãm baêvare anumayanãm.

69.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýatha azem avata verethra hacâne
ýatha vîspa anyê aire.

70.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[18]

71.

ýazaêsha-mê ... dainghu-frâdhanãm ashaonîm,

72.

tãm ýazeñta ashavazdå puthrô pourudhâxshtôish ashavazdasca thritasca sâyuzhdrôish puthra upa berezañtem ahurem xshathrîm xshaêtem apãm napâtem aurvat-aspem satem aspanãm arshnãm hazangrem gavãm baêvare anumayanãm.

73.

âat hîm jaidhyen,
avat âyaptem dazdi-nô
vanguhi sevishte aredvî sûre anâhite
ýat bavâma aiwi-vanyå
dânavô sûra vyâxana karemca asabanem varemca asabanem
tañcishtemca dûraêkaêtem
ahmi gaêthe peshanâhu.

74.

dathat aêibyascit tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[19]

75.

ýazaêsha-mê ... dainghu-frâdhanãm ashaonîm,

76.

tãm ýazata
vistaurush ýô naotairyãnô
upa âpem ýãm vîtanguhaitîm
erezhuxdhât paiti vacanghat
uiti vacêbish aojanô,

77.

tâ bâ asha tâ arshuxdha
aredvî sûre anâhite
ýat mê avavat daêvayasnanãm nijatem
ýatha sârem varsanãm barâmi,
âat mê tûm aredvî sûre anâhite
hushem peshum raêcaya
tarô vanguhîm vîtanguhaitîm.

78.

upa-tacat aredvî sûra anâhita
kaininô kehrpa srîrayå
ashamayå huraodhayå
uskât ýâstayå erezvaithyô
raêvat cithrem âzâtayå
zaranya aothra paitishmuxta
ýâ vîspô-pîsa bâmya
aremaêshtå anyå âpô kerenaot
frasha anyå fratacat
hushem peshum raêcayat
tarô vanguhîm vîtanguhaitîm.

79.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[20]

80.

ýazaêsha-mê ... dainghu-frâdhanãm ashaonîm,

81.

tãm ýazata
yôishtô ýô fryananãm
paiti pêdvaêpê ranghayå satem aspanãm arshnãm hazangrem gavãm baêvare anumayanãm.

82.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýat bavâni aiwi-vanyå
axtîm duzhdem temanghuñtem uta-hê frashna paiti-mravâne navaca navaitîmca xruzhdranãm tbaêshô-parshtanãm ýat mãm peresat axtyô duzhdå temanguhå.

83.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[21]

84.

ýazaêsha-mê ... dainghu-frâdhanãm ashaonîm,

85.

ýahmya ahurô mazdå
hvapô nivaêdhayat
âidhi paiti ava-jasa
aredvî sûre anâhite
haca avatbyô sterebyô
aoi zãm ahuradhâtãm,
thwãm ýazåñte aurvånghô
ahurånghô dainghu-patayô
puthrånghô dainghu-paitinãm.

86.

thwãm naracit ýôi taxma
jaidhyåñte âsu-aspîm
hvarenanghasca uparatâtô,
thwãm âthravanô maremnô
âthravanô thrâyaonô
mastîm jaidhyåñte spânemca
verethrakhnemca ahuradhâtem
vanaiñtîmca uparatâtem.

87.

thwãm kaininô vadhre ýaona
xshathra hvâpå jaidhyåñte
taxmemca nmânô-paitîm,
thwãm carâitish zizanâitish
jaidhyåñte huzâmîm,
tûm tâ aêibyô xshayamna
nisirinavâhi aredvî sûre anâhite.

88.

âat frashusat zarathushtra
aredvî sûra anâhita
haca avatbyô sterebyô
aoi zãm ahuradhâtãm,
âat aoxta aredvî sûra anâhita,

89.

erezvô ashâum spitama
thwãm dathat ahurô mazdå
ratush astvaithyô gaêthayå
mãm dathat ahurô mazdå
nipâtâra vîspayå ashaonô stôish, mana raya hvarenangha pasvasca staorâca upairi zãm vîcareñta mashyâca bizeñgra, azem bôit tûm tâ nipayemi vîspa vohû mazdadhâta ashacithra mãnayen ahe ýatha pasûm pasu-vastrem.

90.

paiti dim peresat zarathushtrô aredvîm sûrãm anâhitãm,
aredvî sûre anâhite
kana thwãm ýasna ýazâne
kana ýasna frâyazâne ýase-tava mazdå kerenaot tacare añtare arethem upairi hvarexshaêtem
ýase-thwâ nôit aiwi-druzhåñte
azhishca arethnâishca vawzhakâishca
varenvâishca varenava-vîshâishca.

91.

âat aoxta aredvî sûra anâhita,
erezvô ashâum spitama
ana mãm ýasna ýazaêsha
ana ýasna frâyazaêsha haca hû vaxshât â-hû frâshmô- dâtôit, â-tû-mê aêtayå zaothrayå frangharôish âthravanô parshtô-vacanghô paiti-parshtô-sravanghô mãzdrô hadha-hunarô tanu-mãthrô.

92.

mâ-mê aêtayå zaothrayå franghareñtu haretô mataftô madrushtô masacish makasvîsh mastrî madahmô asrâvayat- gâthô mapaêsô ýô vîteretô-tanush.

93.

nôit avå zaothrå paiti-vîse ýå mâvôya franguhareñti añdåsca karenåsca drvåsca mûråsca aråsca ranghåsca ava daxshta daxshtavañta ýâ nôit pouru-jira fradaxshta vîspanãm anu mãthrem, mâ-mê aêtayåscit zaothrayå franghareñtu frakavô mâ apakavô mâ drvå vîmîtô-dañtânô.

94.

paiti dim peresat zarathushtrô aredvîm sûrem anâhitãm, aredvî sûre anâhite kem idha tê zaothrå bavaiñti ýase-tava frabareñte drvañtô daêvayasnånghô pasca hû frâshmô-dâitîm.

95.

âat aoxta aredvî sûra anâhita, erezvô ashâum spitama zarathushtra nivayaka nipashnaka apa-skaraka apa-xraosaka imå paiti-vîseñte ýå mâvôya pasca vazeñti xshvash-satâish hazangremca ýâ nôit haiti vîseñti daêvanãm haiti ýasna.

96.

ýazâi hukairîm barezô
vîspô-vahmem zaranaênem
ýahmat mê haca frazgadhaite
aredvî sûra anâhita
hazangrâi bareshna vîranãm
masô xshayete hvarenanghô
ýatha vîspå imå âpô
ýå zemâ paiti frataciñti
ýâ amavaiti fratacaiti.
ahe raya ... tåscâ ýazamaide!

[22]

97.

ýazaêsha-mê ... dainghu-frâdhanãm ashaonîm,

98.

ýim aiwitô mazdayasna
hishteñta baresmô-zasta,
tãm ýazeñta hvôvånghô
tãm ýazeñta naotairyånghô,
îshtîm jaidhyañta hvôvô
âsu-aspîm naotaire,
moshu pascaêta hvôvô
îshtîm baon sevishta
moshu pascaêta naotaire
vîshtâspô ånghãm dah'yunãm
âsu-aspôtemô bavat.

99.

dathat aêibyascit tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[23]

100.

ýazaêsha-mê ... dainghu-frâdhanãm ashaonîm,

101.

ýenghe hazangrem vairyanãm hazangrem apakhzhâranãm, kascitca aêshãm vairyanãm kascitca aêshãm apakhzhâranãm cathware-satem ayare-baranãm hvaspâi naire baremnâi,
kanghe kanghe apakhzhâire
nmânem hishtaite hudhâtem
satô-raocanem bâmîm
hazangrô-stunem hukeretem
baêvare-fraskembem sûrem.

102.

kem kemcit aipi nmâne
gâtu saite hvaêui-staretem
hubaoidhîm barezish havañtem,
âtacaiti zarathushtra
aredvî sûra anâhita
hazangrâi bareshna vîranãm
masô xshayete hvarenanghô
ýatha vîspå imå âpô
ýå zemâ paiti frataciñti
ýâ amavaiti fratacaiti.
ahe raya ... tåscâ ýazamaide!

[24]

103.

ýazaêsha-mê ... dainghu-frâdhanãm ashaonîm,

104.

tãm ýazata
ýô ashava zarathushtrô airyene vaêjahi vanghuyå dâityayå haomayô gava ... vâkhzhibyô.

105.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite,
ýatha azem hâcayene
puthrem ýat aurvat-aspahe
taxmem kavaêm vîshtâspem
anumatêe daênayâi
anuxtêe daênayâi
anu-varshtêe daênayâi.

106.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[25]

107.

ýazaêsha-mê ... dainghu-frâdhanãm ashaonîm,

108.

tãm ýazata
berezaidhish kava vîshtâspô
pasne âpem frazdânaom satem aspanãm arshnãm hazangrem gavãm baêvare anumayanãm.

109.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite,
ýat bavâni aiwi-vanyå
tãthryavañtem duzhdaênem
peshanemca daêvayasnem
drvañtemca arejat-aspem
ahmi gaêthe peshanâhu.

110.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[26]

111.

ýazaêsha-mê ... dainghu-frâdhanãm ashaonîm,

112.

tãm ýazata
aspâyaodhô zairi-vairish
pasne âpô dâityayå satem aspanãm arshnãm hazangrem gavãm baêvare anumayanãm.

113.

âat hîm jaidhyat,
avat âyaptem dazdi-mê
vanguhi sevishte aredvî sûre anâhite
ýat bavâni aiwi-vanyå
peshôciñghem ashtô-kânem
humayakem daêvayasnem
drvañtemca arejat-aspem
ahmi gaêthe peshanâhu.

114.

dathat ahmâi tat avat âyaptem aredvî sûra anâhita hadha-zaothrô-barâi aredrâi ýazemnâi
jaidhyañtâi dâthrish âyaptem.
ahe raya ... tåscâ ýazamaide!

[27]

115.

ýazaêsha-mê ... dainghu-frâdhanãm ashaonîm,

116.

tãm ýazata
vañdaremainish arejat-aspô
upa zrayô vouru-kashem satem aspanãm arshnãm hazangrem gavãm baêvare anumayanãm.

117.

âat hîm jaidhyat,
avat âyaptem dazdi-mê
vanguhi sevishte aredvî sûre anahite
ýat bavâni aiwi-vanyå
taxmem kavaêm vîshtâspem
aspâyaodhô zairi-vairish,
ýatha azem nijanâni
airyanãm dah'yunãm pañcasakhnâi satakhnâishca satakhnâi hazangrakhnâishca hazangrakhnâi baêvarekhnâishca baêvarekhnâi ahãxshtakhnâishca.

118.

nôit ahmâi dathat tat avat âyaptem aredvî sûra anâhita.
ahe raya ... tåscâ ýazamaide!

[28]

119.

ýazaêsha-mê ... dainghu-frâdhanãm ashaonîm,

120.

ýenghe cathwârô arshâna
hãm-tâshat ahurô mazdå
vâtemca vâremca maêkhemca fyanghumca
mîshti zî-mê hîm spitama zarathushtra
vâreñtaêca snaêzhiñtaêca
srasciñtaêca fyanghuñtaêca,
ýenghe avavat haênanãm
nava-satâish hazangremca.

121.

ýazâi hukairîm barezô
vîspô-vahmem zaranaênem
ýahmât mê haca frazgadhaite
aredvî sûra anâhita
hazangrâi bareshna vîranãm
masô xshayete hvarenanghô
ýatha vîspå imå âpô
ýå zemâ paiti frataciñti
ýâ amavaiti fratacaiti.
ahe raya ... tåscâ ýazamaide!

[29]

122.

ýazaêsha-mê ... dainghu-frâdhanãm ashaonîm,

123.

zaranaênem paiti-dânem
vanguhi hishtaite drazhimnô
aredvî sûra anâhita
zaothre vâcim paitishmaremna
avat manangha mainimna,

124.

kô mãm stavât kô ýazâite haomavaitibyô gaomavaitibyô zaothrâbyô ýaozhdâtâbyô pairiangharshtâbyô, kahmâi azem upanghacayeni haca-manâica ana-manâica frâranghâi humananghâica.
ahe raya ... tåscâ ýazamaide!

[30]

125.

ýazaêsha-mê ... dainghu-frâdhanãm ashaonîm,

126.

ýâ hishtaite fravaêdhemna
aredvî sûra anâhita
kaininô kehrpa srîrayå
ashamayå huraodhayå
uskât ýâstayå erezvaithyô
raêvat cithrem âzâtayå
frazushem adhkem vanghânem
pouru-paxshtem zaranaênem

127.

bâdha ýatha-mãm baresmô-zasta
frâ-gaoshâvara sîspemna
cathru-karana zaranaêni,
minum barat hvâzâta
aredvî sûra anâhita
upa tãm srîrãm manaothrim,
hâ-hê maidhim nyâzata
ýathaca hukerepta fshtâna
ýathaca anghen nivâzâna.

128.

upairi pusãm bañdayata
aredvî sûra anâhita
satô-stranghãm zaranaênîm
ashta-kaozhdãm ratha-kairyãm
drafshakavaitîm srîrãm
anu-pôithwaitîm hukeretãm.

129.

bawraini vastrå vanghata
aredvî sûra anâhita
thrisatanãm bawranãm cature-zîzanatãm ýat asti bawrish sraêshta ýatha ýat asti gaonôtema [bawrish bavaiti upâpô]
ýatha-keretem thwarshtâi zrûne
caremå vaênañtô brâzeñta
frêna erezatem zaranim.

130.

âat vanguhi idha sevishte
aredvî sûre anâhite
avat âyaptem ýâsâmi
ýatha azem hvâfritô
masa xshathra nivânâni
ash-pacina stûi-baxedhra
fraothat-aspa canat-caxra
xshvaêwayat-ashtra ash-baourva
nidhâtô-pitu hubaoidhi
upa steremaêshu vârema daidhe
parenanghuñtem vîspãm hujyâitîm
iritheñtem xshathrem zazâiti.

131.

âat vanguhî idha aredvî sûre anâhite
dva aurvañta ýâsâmi
ýimca bipaitishtânem aurvañtem
ýimca cathware-paitishtânem
aom bipaitishtânem arvañtem
ýô anghat âsush uzgastô
hufraourvaêsô vâshå peshanaêshuca
aom cathware-paitishtânem
ýô haênayå perethu-ainikayå
va urvaêsayat karana
hôyûmca dashinemca
dashinemca hôyûmca.

132.

aêta ýasna aêta vahma
aêta paiti ava-jasa
aredvî sûre anâhite
haca avatbyô sterebyô
aoi zãm ahuradhâtãm
aoi zaotârem ýazemnem
aoi perenãm vîkhzhârayeiñtîm
avanghe zaothrô-barâi aredrâi ýazemnâi
jaidhyañtâi dâthrish âyaptem,
ýatha tê vîspe aurvañta
zazvångha paiti-jasãn
ýatha kavôish vîshtâspahe.
ahe raya ... tåscâ ýazamaide!

(Recite silently:)

133.

(hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât.)

(Recite aloud:)

ýathâ ahû vairyô...(2).
ýasnemca vahmemca aojasca zavareca âfrînâmi
apãm vanguhînãm mazdadhâtanãm areduyå âpô anâhitayå ashaonyå [vîspanãmca apãm mazdadhâtanãm vîspanãmca urvaranãm mazdadhâtanãm ashaonyå]. [Gld omits]
ashem vohû....
ahmâi raêshca ... hazangrem ... jasa-mê ... (kerba mazhd) ... ashem vohû...!!