3. Ardwahisht Yasht

Based on edition of Karl F. Geldner, Avesta, the Sacred Books of the Parsis, Stuttgart, 1896.

0.

(pa nãm i ýazdã, hôrmezd i hvadâe i awazûnî gurz hvarahe awazâyât, ardabahisht ameshâspeñd bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe mainyêush, haithyâvarshtãm hyat vasnâ ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

ashahe vahishtahe sraêshtahe airyamanô ishyehe sûrahe mazdadhâtahe saokayå vanghuyå vouru-dôithrayå mazdadhâtayå ashaonyå
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

1.

mraot ahurô mazdå spitamâi zarathushtrâi, âat ýat asha vahishta fradaithîsha spitama zarathushtra staotareca zaotareca zbâtareca mãthranaca ýashtareca âfrîtareca aibijaretareca vanghâna xshaêta raocå hvanvaitîshca verezô ahmâkem ýasnâica vahmâica ýat ameshanãm speñtanãm.

2.

âat aoxta zarathushtrô, mrûidhi bâ vacô arsh-vacô ahura mazda, ýatha tê anghen ýat asha vahishta frâdâhîsh spitama zarathushtra staotareca zaotareca zbâtareca mãthranaca ýashtareca âfrîtareca aibijaretareca vanghâna xshaêta raocå hvanvaitîshca verezô ýûshmâkem ýasnâica vahmâica ýat ameshanãm speñtanãm.

3.

âdim framraomi ashem vahishtem, ýezi framraomi ashem vahishtem âat anyaêshãm ýat ameshanãm speñtanãm hvâyaonem ýim pâiti mazdå humatâish ýim pâiti mazdå hûxtâish ýim pâiti mazdå hvarshtâish, garô-nmâne ahurahe hvâyaonem.

4.

garô nmânem nereyô asti ashâvaoyô naêcish drvatãm ayene paitish garô nmânem ravôhu ashâyaonem cithrem ahurem mazdãm.

5.

janaiti vîspaêshãm angrô mainyush ahmâi ýâthwãm pairikanãmca airyamanem mãthranãm mazishtem mãthranãm vahishtem mãthranãm sraêshtem mãthranãm sraêshtôtemem mãthranãm ukhrem mãthranãm ukhrôtemem mãthranãm derezrem mãthranãm derezrôtemem mãthranãm vârethrakhni mãthranãm vârethrakhnyôtemem mãthranãm baêshazem mãthranãm baêshazyôtemem.

6.

mãthranãm ashô-baêshazô dâtô-baêshazô karetô-baêshazô urvarô-baêshazô mãthrô-baêshazô baêshazanãm baêshazyôtemô ýat mãthrem speñtem baêshazyô, ýô narsh ashaonô haca uruthwãn baêshazyât, aêshô-zî asti baêshazanãm baêshazyôtemô.

7.

ýaska apa-dvarata mahrka apa-dvarata daêva apa-dvarata paityâra apa-dvarata, ashemaokhô anashava apa-dvarata mashyô sâsta apa-dvarata,

8.

azhicithra apa-dvarata vehrkô-cithra apa-dvarata bizeñgrô-cithra apa-dvarata, tarô-mata apa-dvarata pairi-mata apa-dvarata tafnu apa-dvarata spazga apa-dvarata anâxshta apa-dvarata duzhdôithra apa-dvarata,

9.

draokhô vâxsh draojishta apa-dvarata, jahi ýâtumaiti apa-dvarata jahi kahvaredhaine apa-dvarata, vâtô paourvô-apâxtara apa-dvarata vâtô paourvô-apâxtara apa-nasyata ýasca-mê aêtaêshãm ýat azhicithranãm.

10.

ýô janat aêshãm daêvanãm
hazangrâi hazangrô pairi baêvarâi baêvanô paiti ýaska jaiñti mahrka jaiñti daêva jaiñti paityâra jaiñti ashemaokhô anashava jaiñti mashyô sâsta jaiñti,

11.

azhicithra jaiñti vehrkô-cithra jaiñti bizeñgrô-cithra jaiñti tarô-mata jaiñti pairi-mata jaiñti tafnu jaiñti spazga jaiñti anâxshta jaiñti duzhdôithra jaiñti,

12.

draokhô vâxsh draojishta jaiñti jahi ýâtumaiti jaiñti jahi kahvaredhaine jaiñti vâtô paourvô-apâxtara jaiñti vâtô paourvô-apâxtara apa-nasyata ýasca-mê aêtaêshãm ýat bizeñgrô-cithranãm.

13.

ýô janat aêshãm daêvanãm
hazangrâi hazangrô pairi baêvarâi baêvanô
pairi paourva-naêmât patat
dyaosh daêvanãm draojishtô
angrô mainyush pouru-mahrkô.

14.

adavata angrô mainyush pouru-mahrkô, âvôya-mê bâvôya asha vahishta ýaskanãm ýaskôtemem janât ýaskanãm ýaskôtemem tbaêshayât, mahrkanãm mahrkôtemem janât mahrkanãm mahrkôtemem tbaêshayât, daêvanãm daêvôtemem janât daêvanãm daêvôtemem tbaêshayât, paityâranãm paityârôtemem janât paityâranãm paityârôtemem tbaêshayât, ashemaokhô anashava janât ashemaokhô anashava tbaêshayât, mashyô-sâsta-sâstôtemem janât mashyô-sâsta-sâstôtemem tbaêshayât.

15.

azhicithra-azhicithrôtemem janât azhicithra- azhicithrôtemem tbaêshayât vehrkô-cithra-vehrkô-cithrôtemem janât vehrkô-cithra-vehrkô-cithrôtemem tbaêshayât bizeñgrô-cithra-bizeñgrô-cithrôtemem janât bizeñgrô-cithra-bizeñgrô-cithrôtemem tbaêshayât tarô-mata janât tarô-mata tbaêshayât pairi-mata janât pairi-mata tbaêshayât tafnu-tafnôtemem janât tafnu-tafnôtemem tbaêshayât spazga-spazgôtemem janât spazga-spazgôtemem tbaêshayât anâxshta-anâxshtôtemem janât anâxshta- anâxshtôtemem tbaêshayât duzhdôithra-duzhdôithrôtemem janât duzhdôithra- duzhdôithrôtemem tbaêshayât.

16.

draokhô vâxsh-draojishtô janât draokhô vâxsh-draojishtô tbaêshayât jahi ýâtumaiti janât jahi ýâtumaiti tbaêshayât jahi kahvaredhaine janât jahi kahvaredhaine tbaêshayât vâtô paourvô-apâxtara janât vâtô paourvô-apâxtara tbaêshayât.

17.

apanasyât druxsh nasyât druxsh dvârât druxsh vînasyât apâxedhre apa-nasyehe mâ mereñcainîsh gaêthå astvaitîsh ashahe!

18.

ahe raya hvarenanghaca
tem ýazâi surunvata ýasna ashem vahishtem sraêshtem ameshem speñtem zaothrâbyô, ashem vahishtem sraêshtem ameshem speñtem ýazamaide
haomayô gava baresmana, hizvô danghangha mãthraca, vacaca shyaothnaca zaothrâbyasca, arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide.

(Recite silently:)

(hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât.)

19. (Recite aloud:)

ýathâ ahû vairyô...(2).
ýasnemca vahmemca aojasca zavareca âfrînâmi
ashahe vahishtahe sraêshtahe airyamanô ishyehe sûrahe mazdadhâtahe saokayå vanghuyå vouru-dôithrayå mazdadhâtayå ashaonyå.
ashem vohû....
ahmâi raêshca ... hazangrem ... (kerba mazhd) ... ashem vohû...!!