Afrinagan-i Gatha

Based on edition of Karl F. Geldner, Avesta, the Sacred Books of the Parsis, Stuttgart, 1896.

1.

ýathâ ahû vairyô...(8).
ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

ahurahe mazdå raêvatô hvarenanguhatô ameshanãm speñtanãm gâthâbyô speñtâbyô ratuxshathrâbyô ashaonibyô ahunavaityå gâthayå ushtavaityå gâthayå speñtâmainyêush gâthayå vohu-xshathrayå gâthayå vahishtôishtôish gâthayå,

2.

ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

3.

ahurem mazdãm raêvañtem hvarenanguhañtem ýazamaide, ameshâ speñtâ huxshathrâ hudhånghô ýazamaide, gâthå speñtå ratuxshathrå ashaonîsh ýazamaide, ahunavaitîm gâthãm ashaonîm ashahe ratûm ýazamaide, ushtavaitîm gâthãm ashaonîm ashahe ratûm ýazamaide, speñtâ-mainyûm gâthãm ashaonîm ashahe ratûm ýazamaide, vohu-xshathrãm gâthãm ashaonîm ashahe ratûm ýazamaide, vahishtôishtîm gâthãm ashaonîm ashahe ratûm ýazamaide.

4.

ashâunãm vanguhîsh sûrå speñtå fravashayô ýazamaide
ýå vîsâdha âvayeiñti
hamaspathmaêdaêm paiti ratûm âat athra vîcareñti dasa pairi xshafnô
avat avô zixshnånghemnå,

kô nô stavât kô ýazâite kô ufyât kô frînât kô paiti-zanât gaomata zasta vastravata asha-nâsa nemangha kahe nô idha nãma âkhairyât kahe vô urva frâyezyât kahmâi nô tat dâthrem dayât ýat hê anghat hvairyãn ajyamnem ýavaêca ýavaêtâtaêca.
âat ýô nâ-hîsh frâyazâite gaomata zasta vastravata asha-nâsa nemangha ahmâi âfrîneñti xshnûtå ainitå atbishtå ukhrå ashâunãm fravashayô,
buyât ahmi nmâne gêushca vãthwa upa vîranãmca buyât âsushca aspô derezrasca vâxshô, buyât nâ stâhyô vyâxanô ýô-nô bâdha frâyazâite gaomata zasta vastravata asha-nâsa nemangha.
ashem vohû...(3).

5. (râspî:)

ahurahe mazdå raêvatô hvarenanguhatô

(zôt u râspî:)

âfrînâmi xshathrayâne ... mahî(2). (Recite A1.8-12.)
ýathâ ahû vairyô....
ashem vohû...!

6.

ýathâ ahû vairyô...(2).
ýasnemca vahmemca aojasca zavareca âfrînâmi
ahurahe mazdå raêvatô hvarenanguhatô ameshanãm speñtanãm gâthâbyô speñtâbyô ratuxshathrâbyô ashaonibyô ahunavaityå gâthayå ushtavaityå gâthayå speñtâmainyêush gâthayå vohu-xshathrayå gâthayå vahishtôishtôish gâthayå,
ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm.
ashem vohû....
atha jamyât ýatha âfrînâmi,
>> humatanãm hûxtanãm hvarshtanãm yadacâ anyadacâ verezyamnanãmcâ vâverezananãmcâ mahî aibî-jaretârô naênaêstârô ýathanâ vohunãm mahî << (2).
ýathâ ahû vairyô...(21).
ashem vohû...(12).
ahmâi raêshca ... hazangrem ... (kerba mazhd) ... ashem vohû...!!

Go to [Avesta -- Zoroastrian Archives | Khorda Avesta: Contents | Afrinagan-i Gatha | English]