Vishtasp Yasht

[[1]]

1
dahmô ahmi âfrî-vacå, paiti-aoxta zarathushtrô, puthra kava vîshtâspa, hvarenanghå me sadayehi, âat aoxta zarathushtô puthra kava vîshtaspa, âfrînâmi danghupaiti vohu-jîti us-jîti darekhem-jîti, jivaiti te narãm jiviti te nâirikãm jivaiti te puthrô, us-zayåñte tanu-kereta kehrpa h'ayêush.
2
ashava bavâhi ýatha zarathushtrô,
pouru-gâvô ýatha âthwyânôish,
paouru-aspô ýatha paourshaspahe,
ashem-meretô ýatha kava husrava,
ranghãm dûrê-pâranãm amavå ýatha vifrô navâzô.
3
zayåñte tanu-kehrpa dasa puthra,
thrâyô ýatha athaurunô,
thrâyô ýatha rathaêshtârahe,
thrâyô ýatha vâstryehe fshuyañtô,
aêva te puthrô bavâhi ýatha jâmâspô,
âfrînem kerenavâhi dangheush vîshtâspâi.
4
a-ýaska a-mahrka bavâhi ýatha peshô-tanush,
tizhvañtem bavâhi ýatha mithrem,
saokavañtem bavâhi ýatha måñhem,
raoxshnem bavâhi ýatha âthrem, zaranumañtem bavâhi ýatha ýat asti zaranumatô mashyânahe.
5
pasca âfrînem aipi-jasaiti hazañrem ýârem vahishtem ahûm ashaonãm raocañhem vîspô-hvâthrem.
atha jamyât ýatha âfrînâmi,
ashem vohû....

[[2]]

6
dasta amem verethrakhnemca, dasta gêush hvâthrô-nahîm, paiti-aoxta zarathushtrô puthra kava vîshtâspa, dasta narãm paourvatâtem stâhyanãm vyâxananãm vanatãm avanemnanãm hathravanatãm hamerethê stê rapatãm cithravanghãm hathravanatãm dush-mainyush stê rapatãm cithravanghãm.
7
ýazata pouru-hvarenanghô ýazata pouru- baêshazô, cithra vô buyâresh masânå.
8
âat paiti-aoxta zarathushtrô puthra kava vîshtâspa, masânå zavanô-savô, cithrem vô bavå, ýûzhemcit hvarenô ýajemnâi baxshayata âpa, dasta nô tem ýânem jaidhyata ashish vañuhi râtaca vouru-dôithra, hacatu pâreñdica raoratha.
9
cithrem buyå tûmcit ýatha he puthra kava vîshtâspa, poithwem buyå imat nmânem berezi-stûnem gaosûrem, [ayasañha paiti tarô-pithwem daithyât ýatha âthrava.]
10
hãmô-nâfrô raêvatãm paiti- aoxta zarathushtrô puthra kava vîshtâspa daênayåsca mâzdayasnôish, ýatha brâthrem vâ brâta vâ hah'aya vâ daênãmca âcikatôishca bavat ýô haxedhra havara ýim aiwi-vinat ýô ashava zarathushtrô.
11
aojîta zî zarathushtra frashaoshtraêibya jâmâspaêibya, ashayata vâstryatha puthra frashaoshtra, [uiti mraot ahurô mazdå âi ashâum zarathushtra.]
12
paiti-aoxta zarathushtrô puthra kava vîshtâspa, mâ xyâtha duzhzaotârô mâ afrayô- zaotârô, duzhzaotârô zî ahmât afrayô-zaotârô narô paouru raxsãm, ýatha ýôi ayazemna ameshê speñtê ýatha tûm ishaêta.
ashem vohû....

[[3]]

13
âat idha tûm sañhâni tûm ýatha puthrô vîshtâspâi, upa thwâ satem sâsnanãm kerenaomi, thwãm hacat-puthrãm hacat-paêmanyãm kârayô vâ paêmanyô vâ xshviptyô vâ, ýatha ýat te fravaocâma.
14
ahurem mazdãm snaoshemca ashîm daênãmca mâzdayasnîm vîspãmca vîspô-afasmanãm vîspãmca vîspô- verezyãm vîspãmca vîspô-hañkerethyãm hacat-ashãm frâdat- gaêthãm snaota-gaoshãm vouru-rafanahîm narãm ashaonãm nipâthrîm narãm ashaonãm nishañharethrîm narãm ashaonãm.
15
ýâ haca taêca ashâ vidhyaca ashem frâdhatica ashahe gaêthå, naêdhaca narem ashavanem vîdhush-ashem saoshyañtem thwâ paiti-irite, vîspô hâvanânô vîspô âtarevaxshahe vîspô frabarethrô vîspô âberetô vîspô âsnâthrô vîspô rathwishkarahe vîspô snaoshâvarezahe.
16
vîspô athausranô vîspô rathaêshtârahe vîspô vâstryehe fshuyañtô, vîspô nmânahe nmânô-patôish vîspô vîsô vîspatôish vîspô zañtêush zañtupatôish vîspô danghêush danghupatôish.
17
vîspô ýûnô humananghô huvacanghô hushyaothanahe hudaênahe, vîspô ýûnô uxdhô-vacanghô vîspô hvaêtvadathahe vîspô danghâurvaêsahe vîspô humâyehe pairi-jathnô vîspô nmânahe nmânî-pathnyå.
18
vîspe [â te â thâtush] te â ratûsh ýôi heñti ashahe ratavô thryasca thrisãsca nazdishta pairish-hâvanayô ýôi heñti ashahe ratavô thrâtôtemô.
19
te puthra kava vîshtâspa paiti sadhre hamarathanãm aurvathanãm tbishyañtãm satâish satôtemô-sata hazangrâi hazangrôtemô-hazangra baêvarâi baêvarôtemô-baêvara ahãxshtakhnâi ahãxshtôtemô-ahãxshta.
20
imat uxdhem vacô fravaocât ýatha ýat te fravaocâma, dâtô-vanghen ahura mazda, azem thwâ ýasna ýazâne azem thwâ ýasna frâyazâne imat dãma ýat ahurahe mazdå.
21
paiti dim peresat puthrô kava vîshtâspa, kana thwâ azem ýazâne kana ýasna frâyazâne imat dãma ýat ahurahe mazdå.
22
âat mraot zarathushtrô, upa thwâ kånghâmaide, tûm ahi puthrô kava vîshtâspâi, urvaranãm uruthmyanãm zasâi srîra urusta amavaiti, aetat uxdhem vacô fravaocâi, nemô urvaire vanguhi mazdadhâte ashaone.
ashem vohû....
23
baresmana he uzbârayat paoiryô vâ bityô vâ thrityô vâ, upa tû-nô aiwyâste baresma ashaya frastaretem ashaya aiwyâstem anabdâtem avô-dâtem nitemanãmcit vasô-vatem nitemanãmca vasô-jãn-nâirîm xshayañtem.
ashem vohû....

[[4]]

24
âat aoxta zarathushtrô, puthra kava vîshtâspa, nizbayaêsha thwâ ahurô mazdå paouru-hvarenangha ahura mazda thwâshahe hvadhâtahe zrvânahe akaranahe vayaosh uparô-kairyehe, nizbayaêsha vâtô taxmô mazdadhâtô bakhô-baxtô.
25
paiti-mruyå ýatha vâ ýat dathat âyaptem, ahe beretyât drujô vanâne taxmô speñtô- dhâtâi pouru-spaxshtîm tbishyañtãm paiti-jaitîm dushmainyavanãm hathrânivâitîm hamerethanãm aurvathanãm tbishyañtãm.
26
aêtat uxdhem vacô framruyå paourvô vasna shyaothna tanûm uzvarezyât puthra kava vîshtâspa, âtrem speñtem ýazamaide taxmem heñtem rathaêshtârem ýazûm puthrem ahurahe, thwâ paiti âtarô daêum kuñdem banghem vîbanghem avajanyât, drujaskanãm hãm-pataiti drvatãm daêvayasnanãm merezu-jîtîm mashyânãm.
27
pathãm zrvô-dâtanãm upâ thwayeiti ýasna drvaite ýasca ashaone, ýaozhdâthryô ashava pashca para-iristîm daêva drvañtô duzdånghô baodhem avatha fratereseñti ýatha maêshi vehrkavaiti vehrkat haca frateresaiti.
28
garô speñtahe nemâne ýat srîrem karshta vîspô-paêsô uzbârayat hañdâta staotanãm ýesnyanãm, vacô uxdhem zî vâ bavât hâ vâ, nôit nâ paithyåñte she zarathushtra, nâca kainica hanâca, haca baodhô hyât, paiti-aoxta zarathushtrô puthra kava vîshtâspa.
29
izyeiti zî spitama zarathushtra pasca upa-stûitîm avat asô hañdâitîm, ýatha aspa akhrishyâ aparat haca urvaêsât fratarem urvaêsem nâshemna khanânå druja paourvainîshca.
30
izyeiti zî zavavat izyatica mazdyascit vohu ýathana anghe ayãn narasca nâirîsca, nâca jôishca mizhdahe afreraiti gerewyeiti ýô [gerewyaiti ýô] nô aêshãm anghunãm hâtãm nidârô anghat, naêdhaca vanghe paiti ushta vanghô buyât.
31
saoshyãs dîsh verethraja âat ahmâi he dadhât, bavat ýô hah'adhre hanaire [âpô nôit maêsmana gêush zasta], âat tûm puthrô berethyât, bvat ýô asti snaodhô-manå, ýô nôit atha snaodhô-vacå, ýô nôit atha snaodhô-shaothnå.
32
sraota me merezhdâta me, jimama te daêsayama te zarathushtra, vaêm ýôi ameshâ speñta, aheca anghêush darekhâi haosravanghâi, manahyeheca anghêush darekhâi havanghâi urune asti vahishtem.
33
nî ushtatâite nî vahishtâi anguhe nî ahurahe mazdå garô nemânâi ýat srîrem karshta vîspô-paêsô, ýatha âat anghaot baodhô-baxtica ýatha mâvaya ýat ahurâi mazdâi srîrâi, peresô disyatu ýatha mâvaya ýat ahurâi mazdâi.
ashem vohû....

[[5]]

34
baxshåñti raêshca hvarenasca frayãhathawdhca aurvat-aspâca usasca ahmâi puthrãsh dadhâiti usaiti jamyât tûm puthrô kava vîshtâspa, paiti-aoxta zarathushtrô, daênayåsca mâzdayasnôish ýatha ýat te fravaocâma, bavat ýô hah'edhrâi hanaire.
35
bâdha te framruyå, tarasca ånghânô sarascañtîsh hvarethå bairyeiñte, te aêibyô bairyeiñte aêshãm dim frâyô-vohunãm, naêdha thwãm hãm-pathyeiti drujô spaiti athra, xshathrât xshayamna xshôithra, mâ thwâ daêna mâzdayasnîsh aspahe sparôit sparmaiti.
36
te zhî hãmshishtô vîspahe anghêush astvatô, bâdha hishteñtå tûm brâtravaitîsh, bâdha idha hishtahe anyehe dûre srayanô hvareñtîsh perespanaêshuca, bâdha thwãm tarasca ånghânô saocayañta âiti nirâzayañti, râta vanguhi mazdadhâte ashaone.
37
hâmô-nâfrô raêvatãmca, paiti-aoxta zarathushtrô puthra kava vîshtâspa daênayåsca mâzdayasnôish puthrô, ahmâi verethrakhnâi drvatãm nâfrîm tbaêshô, mâ thwâ angra mainyavô manishtish âstâraite ýatha ýat varenanghãm vahishta saocayaca kerenavô baosayâca vah'edhråsca varô-jinô urvarô-strãmca kerenavô.
38
ahmâi âtarsh âfrînât, ahmâi baoidhi vîjasât, xshnûtô atbishtô hakhdhanghum, upa thwâ haxshôit gêush vãthwa, upa vîranãm pourutâs, upa thwâ verezvatca manô, verezvatica haxshôit anguha, urvaxsh anguha gaya jikhaêsha tå xshapanô ýå jvâhî, barat âyaptem baxtaca nivaxtaca, thwãm tat upa-zbayata, satavaêsa ârôima hvarenanghe anghe astvaiti, hvarenazdå hvafrîrå apaitish-hvarethå bavâni.
39
te mazda havãm adasta, upa-staoiti aêshãm vacãm amem verethrakhnem dasvare baêshazem fradathem varedathem vaxshathem, âmrute nimruye hãmbara hathra ana gâthwya vaca, garô-nemâne ahurô mazdå jasat paoiryô, thwãm tat upa-zbayata.
ashem vohû....

[[6]]

40
ameshâ speñtâ aoshañtâ, paiti-aoxta zarathushtrô puthra kava vîshtâspa, sraoshemca ashîm nairîmca sanghem huraodhem âtaremca ahurahe mazdå barajâimca kavaêm hvarenô, paourvô vasna shnaothna tanûm peresångte.
41
âat thwãm tarasca xshapanem xratûm peresât ashavanem, âat thwãm tarasca xshapanem xratêush aêshayå jakhârayañtem, thrishicat te hamahe ayãn tanûm usrârayå gave hudhånghe vâstryañta.
42
aêshãm xyât zarathushtra danghishtaêshva ratuthwem, aêshãm ratush zarathushtra ashahe daêsayât pañtãm, tem pañtãm hathrayen hathra kaya anghâ verethrakhnem ýat daênayå mâzdayasnôish, avatha narô hava urva asha vahishta usen frâyañtô, tarô peshûm dûraê-srûtem ýim cinvatô amavañtem ýim hupâtem asha-pâtemca.
43
âat ýat tûm bavãn dâtå dâmãn fratarenixma, zarathushtrô paiti-aoxta puthra kava vîshtâspa, thwãm tat upazbaya ýat pâtayasca nipâtayâi månghemca hvareca, bavat ýô hah'edhre hanairyâi, âvôya athra avadidhaêm, uiti davata dushhvarenå angrô mainyush pouru-mahrkô.
44
ãsta avaspayama vâ davôsa vâ apa hvaêtêush vâ bavât, aêtahmâcit nidarejayen frâ-hîmcit nidarejayen ýezi nôit spâ avacå vâ, adhâityô-xratush pasûm vâ narem vâ raêshayât, para he irishiñtô raêshem cikayat baodhô-hvarshtahe cithaya, cikayat sûnahe raêshô baodhô-varshtahe cithaya, paoirîm dahmem irithyât paoirîm dahmem raêshayât para hâu irishiñtãm raêshô baodhô-varshtahe cithaya.
ashem vohû....

[[7]]

45
upâ thwâ haxshaêsh ashâum puthra kava vîshtâspa, satâre baêvare-mishtem baêvare-vaêdhayanem ýâre-drâjô, ashâum vîshtâspa, azaresô amraxsãn afrityô apuyãn bûiri gaosh bûiri hvaretha bûiri vastra bûiri anyaêibyô mazdayasnaêibyô.
46
bavat ahmâi tat avat âyaptem ýatha ýat tå azem fravaocâmi ameshanãm speñtanãm hvarenô, baxshåñti raêshca hvarenasca fshuyãn hathwaca aurvat-aspâca, usasca usca ahmâi puthrãsh dadhâiti yå sûra vîspa mazishta, berezat idha srâvayeidhyâi ishtôish xshathrem ahurahe dathushô.
47
speñtasca mainyush angrasca haxshatha he katarascit urûtatahe keretahe ýasnâica, ýazica dem hacayât ahmâkem ýasnâica arathwya vahmâica xshayeta, hâu arathwya xshathra nôit xshayeti.
48
ahmya arathwya anghêush dadhâiti ýahmya hâu danghêush danghu-paitish, ahmya aspa hubarâna ahmya ratha hvazâna, xshathrem daidhîsh zarathushtra xshathrem apara daidhîsh ýazaoishcina.
49
âat ana parô dushkereta, âat ana parô mãthrô speñtô, frâ-te zãthemca vaxshathemca azemca idha frasnayeni frâ te kehrpemca tevishîmca ýaozhdathâni, kerenaomi thwãm hacat-puthrãm hacat-paêmanyãm, kâravaiti vâ xshviptavaiti vâ paêmavaiti vâ raokhnavaiti mazgavati frazaiñtivaiti vâ frâ te hazangrem h'ãm azem idha frasnayeni gaodhanem avi idha hañtacinå ýat asti puthrahe thrimô.
50
mâ mãm dravô paiti dadhaoish, ýezi mãm dravô tafanush para urvâsmana varahe ana mâtrãm dathaite vanguhîm speñtãm ârmaitîm, us anghå varenô barâhi khanahe paêma hâirishinãm vîspanãm apipyûshinãm.
51
ãzahû dravô frâtavat, parô âthrô baodhô dûrât nemaiti ýat frîm dathushô ahurâi mazdâi nôit thwat paiti vohu manô, katha sîsraya ayaca te dishânaya tbishtå heñti vîspå, ýå heñti speñtahe mainyêush dâmãn.
52
ýãm dûrât paitishmareñte mithrô rashnushca razishtô ýâca daêna mâzdayasnish, te narêsh paiti-shmareñtem verejiñtem saxsheñtem sâcayañtem paitishañtem ýatha ýat te fravaocâmi puthrô berethyât sairimananãm vah'edhrâi.
ashem vohû....

[[8]]

53
ushtavaityå gâthayå sraothrem uxdhem vacô, ushta ahmâi bâdha ashaom puthra kava vîshtâspa, ýahmâi ushta kahmâicit vasê-xshayãs mazdå dâyât ahurô, kva aêtãm xshapanem hvô urva vanghaiti.
54
âat aoxta ahurô mazdå, avatha bâ puthra frashaoshtra, asne vakhdhanât nishhidhaiti ushtavaitîm gâthãm sravayå ushtatâtem nimraomnô,
ushtâ ahmâi ýahmâi ushtâ kahmâicit, paoiryãm xshapanem havô urva vanghaiti hûxte bityãm hvarshte thrityãm pathå paiti vîcarenå.
55
thrityå xshapô thraoshta, puthra frashaoshtra vyusã sadhayeiti ýô narsh ashaono urva arvarâhuca paiti baoidhishca vîshidhâremnô sadhayeiti, â-dim vâtô upa-vâvô sadhayeiti rapithwitarat haca naêmât rapithwitaraêibyô haca naêmaêibyô hubaoidhish hubaoidhitarô anyaoibyô vâtaêibyô, â-dim vâtem nånghubya uzgrembyô sadhayeiti, âat dim aoxta peresô, kudat-aêm vâtem vâiti ýim ýava vâtem nånghubya hubaoidhitemem jigaurva.
56
anghå dim vâtayå frêreñti sadhayeiti ýâ hva daêna, kainînô kehrpa srîrayå xshôithnyå aurusha-bâzvô amayå huraodhayå huzarshtayå berezaityå eredû-fashtânyå sraotanvô âzâtayå raêvat-cithrayå pañcadasayå raodhaêshva kehrpa avavatô srîrayå ýatha dâmãn sraêshtâish.
57
â-dim aoxta peresô ýô narsh ashaonô urva, cishca tûm carâitish ahi ýãm it ýava caraitinãm kehrpa sraoshtãm dâdaresa.
58
âat he paiti-aoxta ýâ hava daêna, azem bâ te ahmi ýuvan humanô hvacô hushyaothna hudaêna ýâ hava daêna hvaêpaithe tanvô, cishca thwãm cakana ava masanaca vanghanaca srayanaca hubaoidhitaca verethrajãstaca paiti-dûêshayañtaca ýatha ýat me sadhayehi, tum mãm cakana ýuvan humanô hvacô hushyaothana hudaêna ava masanaca vanghanaca srayanaca hubaoidhitaca verethrajãstaca paiti-dûêshayañtaca ýatha ýat te sadhayemi.
59
ýat tûm aini avaênôish saocayaca kerenvañtem baoishyaca ýatha vah'edhråsca varôzheñtem urvarô-strãmca kerenvañtem, âat tûm nishhidhôish gâthåsca srâvayô apasca vanguhîsh ýazemnô âtremca ahurahe mazdå naremca ashavanem kuxshnvãnô asnâatca jaseñtem dûrâatca.
60
âat mãm fritãm haitîm fritôtarãm srîrãm haitîm srîrôtarãm berexdhãm haitîm berexdhôtarãm frataire gâtvô ånghanãm fratarôtarãm hâdhayôish, aêta humata aêta hûxta aêta hvarshta, âat mãm narô paskât ýazeñte ahurem mazdãm darekhô-ýashtîmca hãm-parshtîmca.
61
paoirîm gâma frabarat ýô narsh ashaonô urva humate paiti nidadhât, bitîm gâma frabarat ýô narsh ashaonô urva hûxte paiti nidadhât, thritîm gâma frabarat ýô narsh ashaonô urva hvarshte paiti nidadhât, tûirîm gâma frabarat ýô narsh ashaonô urva anakhraêshva raocôhva paiti nidadhât.
62
âat hîm aoxta peresô pourvô ashava para- irithyô, katha ashâum para-irithyô, katha ashâum apa-jasô [shitibyasca haca gaomavaitibyasca vayaêibyasca haca mâyavaitibyasca] astvatat haca anghaot manahîm avi ahûm, ithyejanghatat haca anghaot aithyejanghuñtem avi ahûm, katha te darekhem ushta abavat.
63
âat mraot ýô ahurô mazdå, mâ dim peresô ýim peresahi ýim xrvañtem âithivañtem urvishtravañtem pañtãm item ýat astasca baodhanghasca vî- urvîshtîm.
64
hvarethêm he bara zaremayehe raokhnahe, tat asti ýûnô humanangô hvacanghô hushyaothnahe hudaênahe hvarethem pasca para-iristîm, tat nâirikayâi frâyô-humatayâi frâyô-hûxtayâi frâyô-hvarshtayâi hush-hãm-sâstayâi ratuxshathrayâi ashaonyâi hvarethem pasca para-iristîm.
65
fravaocâma zarathushtrô spitama puthra kava vîshtâspa
kâm nemôi zãm ahura mazda kuthrâ nemôi ayenî.
ashem vohû....

Go to [Avesta -- Zoroastrian Archives | Avesta Fragments: Contents | Vishtasp Yasht | English]